اروپا اتفاقی یېتکچیلری بروکسلده بیر نېچه ساعت دوام اېتگن مذاکرهلردن سۉنگ، کېینگی ایکّی ییل ایچیده اوکرایننینگ مدافعه خرجتلرینی قاپلش اوچون بو مملکتگه۹۰ میلیارد یورو بېریشگه کېلیشیب آلدیلر.
رویترز خبریگه کۉره، اروپا کېنگشی رئیسی آنتونیو کاستا بوگون (جمعه،۲۸ قوس) بۉلیب اۉتگن مطبوعات انجمنیده اوشبو مبلغ اروپا اتفاقی بودجهسی حسابیدن اجرهتیلیشینی ایتگن.
بیراق اروپا اتفاقی یېتکچیلری روسيه نینگ موزلهتیلگن دارایلریدن فایدهلنیب اوکراینگه یاردم بېریش مسألهسیده کېلیشووگه اېریشه آلمهدیلر.
شو بیلن بیرگه، اولر اروپا کمیسیونیگه روسيه نینگ موزلهتیلگن دارایسی اساسیده اوکراینگه «وام غرامت» بېریش رېجهسی اوستیده ایشلشنی دوام اېتتیریش وظیفهسینی تاپشیردیلر.
رویترزنینگ یازیشیچه، بلجیم قرشیلیگی سببلی اروپا اتفاقی یېتکچیلری روسيه نینگ موزلهتیلگن دارایسیدن فایدهلنیب اوکراینگه قرض بېریش بارهسیده کېلیشه آلمهگن.
اروپا اتفاقیده موزلهتیلگن روسيه دارایسی نینگ عمومي حجمی۲۱۰ میلیارد یورونی تشکیل اېتهدی، شوندن۱۸۵ میلیارد یوروسی بلجم ده سهقلنماقده.
رویترزنینگ قۉشیمچه قیلیشیچه، بلجم بو مبلغلر اوکراین نی قۉللب-قوّتلش اوچون فایدهلنیلسه، روسيه نینگ حقوقي دعوالری و جواب چارهلریدن خواطرده.
اروپا اتفاقی یېتکچیلرینینگ تأکیدلشیچه، روسيه اوکراینگه اوروش تاوانینی تۉلهمهگونچه، اونینگ دارایلر موزلهتیلگن حالده قالهدی.
شونینگدېک، اولر اوکراین فقط روسيهدن اوروش وام غرامت آلگن تقدیردهگینه اروپا اتفاقیدن آلینگن مبلغ نی قَیتریشگه مجبور بۉلیشی حقیده هم کېلیشیب آلدیلر.
