پاکستان تشقی ایشلر وزیرلیگی مطبوعات سۉزلاوچیسی طاهر اندرابينینگ ایتیشیچه، افغانستانده جنگری گروهلرنینگ دوام اېتهیاتگن موجودلیگی اوشبو مملکتده ایچکی برقرارلیک و ترقیات یۉلیده آلیب باریلهیاتگن سعی-حرکتلرنی ضعیفلشتیرماقده.
او بوگون (پنجشنبه، ۲۷ قوس) اۉتکزیلگن مطبوعات انجمنیده افغانستانده ترورچی عنصرلر موجودلیگی منطقوی تینچلیک و خوفسیزلیک اوچون جدّي تهدید اېکنینی تأکیدلهدی.
جیو نیوز خبریگه کۉره، اندرابی بیرلشگن ملتلر تشکیلاتی خوفسیزلیک کېنگشینینگ سۉنگّی گزارشیده پاکستاننینگ اوزاق ییللیک موضعینی انیق قۉللب-قوّتلنگنینی و افغانستان توپراغیده بیر نېچه فعال ترورچی تشکیلاتلر بارلیگی تصدیقلنگنینی ایتگن.
اونینگ قۉشیمچه قیلیشیچه، جنگری گروهلر پاکستان و طالبان اۉرتهسیده برقرار مناسبتلر اۉرنهتیلیشیدهگی اېنگ کتّه تۉسیق بۉلیب قالماقده.
پاکستانلیک اوشبو رسمی شونینگدېک، اسلام آباد منطقهدهگی عمومي خوفسیزلیک معمالرینی حل اېتیش اوچون برقرار دیپلوماتیک ملاقاتنی قۉللب-قوّتلشده دوام اېتیشینی بیلدیرگن.
پاکستان آلدین هم بیر نېچه بار طالبان افغانستانده پاکستانلیک گروهلرگه، جملهدن تیتیپیگه (پاکستان طالبان حرکتی) باشپناه بېرهیاتگنی و بو گروهلر افغانستان توپراغیدن توریب پاکستانگه قرشی فعالیت یوریتهیاتگنینی دعوا قیلگن. طالبان اېسه بو عیبلاولرنی رد اېتهدی.
شونگه قرهمهی، بیرلشگن ملتلر تشکیلاتی اۉز گزارشلریده افغانستانده قوراللی گروهلر موجودلیگینی تصدیقلهیدی.
خوفسیزلیک کېنگشینینگ سۉنگّی گزارشیده طالبان رهبریتی ایچیده تیتیپی مسألهسیده کېلیشماوچیلیکلر موجودلیگی قید اېتیلگن. خصوصاً، اَیریم یوقاری مرتبهلی طالبان رهبرلری تیتیپینی پاکستان بیلن مناسبتلر اوچون ضررلی دېب حسابلهسهلر، باشقهلر اېسه اوشبو گروهنی قۉللب-قوّتلشده دوام اېتماقده.
سۉنگّی آیلرده طالبان و پاکستان اۉرتهسیدهگی کېسکینلیک چېگره تۉقنهشوولریگه آلیب کېلگن. اوشبو تۉقنهشوولر قطر واسطهچیلیگیده تۉختهتیلگن، بیراق تامانلر اۉرتهسیدهگی مذاکرهلر حاضرچه نتیجه بېرمهگن. پاکستان طالبان افغانستان توپراغیدن ترورچی گروهلر اۉتیب کېلیشی نینگ آلدینی آلیش بۉییچه یازمه کفالت بېریشینی طلب قیلماقده.
