طالبلر تشقی ایشلر وزیری امیرخان متقی، ایران تشقی ایشلر وزیرلیگینینگ جَنوبي آسیا بۉییچه دفتری مدیری محمد رضا بهرامی بیلن اوچرهشیب، افغانستان بۉییچه تهران منطقوي ییغیلیشی یوزهسیدن صحبتلشدی.
طالبان تشقی ایشلر وزیرلیگی معلوماتیگه کۉره، اوشبو اوچرهشوو بوگون (چهارشنبه،۲۶ قوس) کونی کابلده بۉلیب اۉتگن.
وزیرلیک بیاناتیده ایتیلیشیچه، بهرامي اوچرهشوو دوامیده تهرانده اۉتکزیلگن سۉنگّی منطقوي ییغیلیش حقیده باتفصیل معلومات بېرگن.
شونینگدېک، طالبان تشقی ایشلر وزیرلیگینینگ قۉشیمچه قیلیشیچه، ایرانلیک رسمي طالباننی منطقه نینگ فعال اعضالریدن بیری صفتیده کۉریب، منطقوي همکارلیکلرده فعال رۉل اۉینشیگه امید بیلدیرگن.
بیاناتگه کۉره، امیرخان متقي هم اوشبو اوچرهشووده طالبان نینگ تهران ییغیلیشیگه نسبتاً موضعینی توشونتیریب بېرگن.
متقي طالبان نظارتی آستیدهگی افغانستان آغیر وضعیتدن چیقیب، ترقیات سری قدم قۉیهیاتگنینی ادعا قیلگن.
اونینگ ایتیشیچه، افغانستان اېندی «معما» صفتیده قرهلمسلیگی کېرهک و طالبان اۉز تشقی سیاستی دایرهسیده منطقه دولتلری بیلن فعال مناسبت و همکارلیک آلیب بارماقده.
تهران منطقوي ییغیلیشی جاري هفتهنینگ دوشنبه کونی افغانستاننینگ قۉشنی دولتلری و روسيه نینگ مخصوص وکیللری اشتراکیده بۉلیب اۉتگن.
