اروپا اتفاقی افغانستان قیشلاق جماعهلرینی قۉللش اوچون۷ میلیون یورو مقداریده یاردم اجرهتماقده.
افغانستاندهگی اروپا اتفاقی نمایندهلیگینینگ معلوم قیلیشیچه، اوشبو مبلغ «افغان اید» تشکیلاتی و اونینگ همکارلریگه تاپشیریلهدی. مبلغ اقلیم اۉزگریشلریگه ماسلشیش، تیریکچیلیک منبعلرینی مستحکملش و قیشلاق جماعهلریده برقرارلیکنی آشیریشگه صرفلنهدی.
اروپا اتفاقینینگ افغانستاندهگی ورونیکا بوسکوویچ پوهار «جمعیت درجهسیده اقلیمي برقرارلیککه سرمایه کیریتیش افغانستان نینگ کېلهجکدهگی برقرارلیگی و اۉزینی اۉزی تأمینلشی اوچون ضرور. بیز نینگ۷ میلیون یورولیک یاردمیمیز حتی اېنگ چېکّه حدودلردهگی عایلهلرگه هم اقلیم اۉزگریشلریدن اۉز دارایلرینی حمایه قیلیش امکانینی بېرهدی.»
اروپا اتفاقی معلوماتیگه کۉره، اوشبو ینگی یاردم بیلن کېنگ قمراولی لایحهنینگ ایکّینچی باسقیچی آلتی ولایتده عملگه آشیریلهدی.
لایحه قیشلاق جماعهلری دوچ کېلهیاتگن اۉز ارا باغلیق معمالر جملهدن قورغاقچیلیکلر، ویرانکار تاشقینلر و چېکلنگن اقتصادي امکانیتلرگه قرشی کورهشیش اوچون ایشلب چیقیلگن.
کابلدهگی اروپا اتفاقی نمایندهلیگی تیناوون هم افغانستان خصوصي سکتورینی قۉللش اوچون ۵ میلیون یورو اجرهتیلگنینی اعلان قیلگن اېدی.
شونینگدېک، اروپا اتفاقی اۉتگن هفته افغانستان اهالیسی تیریکچیلیگی و آزیقلنیشینی یخشیلش اوچون۲۵ میلیون ېوروالیک یاردمنی هم معلوم قیلگن.
اروپا اتفاقینینگ یاردملری افغانستاندهگی اقتصادي وضعیت تاباره یامانلشیب بارهیاتگن بیر پیتده دوام اېتماقده.
بیرلشگن ملتلر تشکیلاتی تامانیدن اعلان قیلینگن آزیق-آوقت خوفسیزلیگی (آیسیپی) سۉنگّی حساباتگه کۉره، کېلهیاتگن قیشده۱۷.۴ میلیون کیشی آغیر آزیق-وقت تنقیصلیگیگه دوچ کېلیشی کوتیلماقده.
