بیرلشگن ملتلر تشکیلاتی بالهلرنی قۉللش صندیغی(یونیسف) نینگ معلوم قیلیشیچه، ۲۰۲۶ییلده افغانستاندهگی۱۲ میلیون آدم، جملهدن ۶.۵ میلیون باله اوچون۹۴۹.۱میلیون دالر مقداریده بودجه ضرور بۉلهدی.
اوشبو بودجه هر بیر باله نینگ افغانستانده یشش و رواجلنیش امکانیتیگه اېگه بۉلیشینی تأمینلش اوچون جوده مهم اېکنلیگی تأکیدلنگن. یونیسف معلوماتیگه کۉره، بو مبلغ یاردمیده حیات سقلاوچی یاردملر و بیرلمچی خدمتلر کۉرسهتیلهدی، شاشیلینچ انسانپرورلیک احتیاجلری قاندیریلهدی و جمعیت نینگ چیدملیلیگی مستحکملنهدی.
یونیسفنینگ بیاناتیده ایتیلیشیچه، کېلهسی ییلده جمعی۲۱.۹میلیون آدم، جملهدن۱۱.۶میلیون باله، انسانپرورلیک یاردمی طلب قیلهدی. افغانستانده بالهلرنی قۉللب-قوّتلش بۉییچه بحران چوقورلشماقده، عیاللر، حاملهدارلیک یاشیدهگی عیاللر، بالهلر، یاشلر و چېتگه سوریلگن گروهلر تاباره کۉپراق خوف آستیده.
شونینگدېک، عیاللر و قیزلر تیزیملی حقوقي بحرانگه دوچ کېلماقده. اولرنینگ تعلیم و ایشلش حقوقلری نینگ منع قیلینیشی، کوندهلیک حیاتدهگی کېنگ قمراولی چېکلاولر حمایه خوفینی آشیرهدی و اوزاق مدتلی چیدملیلیککه تهدید سالهدی.
یونیسف شونینگدېک، سوو، کانالیزاسیون و ساغلیقنی سقلش ساحهلریگه اوزاق مدتلی یېتیشماوچیلیگی، دایمي اقلیم ضربهلری بیلن کوچهییب، انسانپرورلیک احتیاجلرینی آشیرگنینی و جمعیت چیدملیلیگینی ضعیفلشتیرگنینی قید اېتهدی.
بوندهی شرایطده، یونیسف نینگ ضرور خدمتلرنی کۉرسهتیشده و اېنگ ضعیف قتلملرنی حمایه قیلیشدهگی دایمي اشتراکی حیاتي اهمیتگه اېگه.
شو بیلن بیرگه، بیرلشگن ملتلر تشکیلاتی نینگ انسانپرورلیک یاردملرینی موافقلشتیریش ادارهسی (اوچا) کېلهسی ییلده افغانستانده ۲۱.۹ میلیون آدم انسانپرورلیک یاردمیگه محتاج بۉلهدی دېب معلوم قیلگن اېدی. اوچانینگ ایتیشیچه، انسانپرورلیک تشکیلاتلری ۱۷.۵ میلیون آدمگه یاردم کۉرسهتیشنی اوستوار قیلگن و بو نینگ اوچون۱.۷۲میلیارد دالر بودجه سۉرهگن.
