اروپا اتفاقینینگ کابلدهگی نمایندهلیگی خلق ارا مالی شرکتی (آیافسی) جهان بانکی گروهیگه کیرووچی توزیلمه بیلن۵ میلیون یورولیک کېلیشوو امضالهگنینی معلوم قیلدی. اوشبو کېلیشوو «افغانستان خصوصي سکتورینی برقرارلشتیریش دستوری»نی عملگه آشیریشگه قرهتیلگن.
اوشبو نمایندهلیک بوگون (دوشنبه،۲۴ قوس) اعلان قیلگن بیاناتیده مذکور کېلیشوو امضالنگنینی بیلدیرگن.
بیاناتده ایتیلیشیچه، بو دستور اروپا اتفاقی و جهان بانکی گروهی اۉرتهسیدهگی افغانستاندهگی همکارلیکنینگ اېنگ سۉنگّی نمونهلریدن بیری دیر.
اروپا اتفاقینینگ تأکیدلشیچه، دستورنینگ اساسي مقصدی خصوصي سکتورگه اساسلنگن، فراگیر اقتصادنی تیکلش آرقهلی اقتصادي برقرارلیکنی تأمینلش و اهالینینگ تورموش منبعلرینی یرهتیش دیر.
اروپا اتفاقی نمایندهلیگینینگ معلوماتیگه کۉره، «افغانستان خصوصي سکتورینی برقرارلشتیریش دستوری» کېلهسی آی باشلنهدی و ۴۲ آی دوام اېتهدی.
دستور قوییدهگی یۉنهلیشلرگه قرهتیلهدی: تجارت محیطینی یخشیلش اوچون خصوصي سکتور موافقلشتیریش و حمایه دادخواهلیک میکانیزملرینی کوچهیتیریش؛ کیچیک و اۉرته کارخانهلر همده ستارتپلر صلاحیتینی آشیریش؛ عیاللر، قَیتیب کېلگنلر و ایچکی کۉچیریلگن شخصلر اوچون امکانیتلرگه علیحده اعتبار قرهتیش؛ مالی امکانیتلرنی کوچهیتیریش؛ خصوصي سرمایهنی جلب اېتیشنی رغبتلنتیریش؛ مهم ساحهلرده ایش اۉرینلری یرهتیش؛ عیاللرنینگ اقتصادي اشتراکی و بندلیگینی کېنگهیتیریش اوچون خصوصي سکتور همکارلیگینی تېزلشتیریش.
اروپا اتفاقی نینگ افغانستاندهگی وکالتخانهسی سرپرستی ورونیکا بوسکوویچ پوهار، بو تشبث اروپا اتفاقی نینگ افغانستان خلقینی هر تامانلهمه قۉللب-قوّتلش سیاستی نینگ بیر قِسمی دی.
اونینگ قۉشیمچه قیلیشیچه، دستور، اینیقسه عیاللر، یاشلر و اولکهگه قَیتیب کېلگنلر اوچون استراتژیک قیمت زنجیرلریده ایش اۉرینلری و تدبیرکارلیکنی قۉللب-قوّتلهگنی سببلی مهم اهمیتگه اېگه.»
آیافسی نینگ یقین شرق، پاکستان و افغانستان بۉییچه منطقوي مدیری خواجه آفتاب احمد هم بو کېلیشوو افغانستان تدبیرکارلریگه بۉلگن مجبوريتنی ینه بیر بار تصدیقلشینی ایتگن.
او شوندهی دېدیې، بیز سعی-حرکتلرنی بیرلشتیریب، خصوصي سکتورگه برقرارلشیش، اۉسیش و ایش اۉرینلری یرهتیشده یاردم بېریشگه اینتیلهمیز، اینیقسه عیاللر، یاشلر و قَیتیب کېلگنلر اوچون. هېچ بیر تشبث یکّه حالده برچه معمالرنی حل قیله آلمهیدی، بیراق تجارتنی مستحکملش تورموش منبعلرینی حمایه قیلیش و افغانلرنی شأن بیلن قَیته تیکلنیشیده قۉللب-قوّتلش نینگ عملي یۉلی دیر.
اروپا اتفاقینینگ معلوم قیلیشیچه، مذکور دستور کیچیک و اۉرته کارخانهلرگه سرمایه کیریتیشنی یېنگیللشتیرهدی، تدبیرکارلرنی قۉللب-قوّتلهیدی و مالیوي خدمتلردن فایدهلنیش امکانینی یخشیلهیدی.
شونینگدېک، دستور عیاللر، یاشلر و قَیتیب کېلگنلرنینگ اقتصادي اشتراکیگه علیحده اعتبار قرهتهدی همده خصوصي سکتور بیلن یقین همکارلیکده ایش اۉرینلری و تجارت اوچون قولهی محیطنی یخشیلشگه قرهتیلگن.
اروپا اتفاقینینگ تأکیدلشیچه، اوشبو دستور باشقه یی دستورلری، اینیقسه قیشلاق ترقیاتی و کیچیک مالیهلشتیریش ساحهلریدهگی تشبثلر بیلن اویغونلشگن حالده ایشلب چیقیلگن و جهان بانکی نینگ کېلهجکدهگی تشبثلرینی هم کوچهیتیرهدی.
