افغانستانده دارو نرخلری آشگنی آرتیدن، طالبانینگ ساغلیقنی سقلش وزیری نورجلال جلالي دارو واسطهلرینی عمده ساتیش اویوشمهلری، وارد قیلووچی شرکتلر و داروخانهلر مسووللری بیلن نرخلرنی نظارت قیلیش همده دارو ذخیرهلب قۉییلیشینینگ آلدینی آلیش مسألهلرینی محاکمه قیلدی.
پاکستان بیلن چېگرهلر یاپیلیشی و اوشبو مملکتدن دارو کېلتیریش تۉختهتیلیشی آرتیدن افغانستانده دارو نرخلری آشگن.
طالبان نظارتی آستیدهگی احصائیه و معلومات ادارهسی معلوماتلریگه کۉره، عقرب آییده افغانستانده دوالنیش و طبي خدمتلر خرجتی ۱۳.۹ فایزگه آشگن.
افغانستاندهگی دارونینگ کتّه قِسمی پاکستاندن آلیب کېلینر اېدی.
طالبان افغانستان سوداگرلریگه پاکستاننینگ شرکتلری بیلن مالی حساب-کتابلرنی یکونلش اوچون اوچ آی مدت بېرگن. شوندن سۉنگ پاکستاندن دارو وارد قیلیش تۉلیق منع اېتیلهدی.
طالبان ادارهسی ضرور دارو-درمانلرنی باشقه دولتلردن تأمینلشگه حرکت قیلهیاتگنینی بیلدیرگن.
طالباننینگ صناعت و تجارت وزیرلیگینینگ معلوم قیلیشیچه، افغانستان و هندستان کمپنیلری اۉرتهسیده دارو وارد قیلیش و افغانستانده ایشلب چیقریش بۉییچه۱۰۰ میلیون دالرلیک شرطنامه امضالنگن.
شونینگدېک، طالبان رسميلری ایران رسميلری بیلن افغانستانگه دارو وارد قیلیشنی آشیریش مسألهسیده هم مذاکرهلر آلیب بارگن.
