طالبان تشقی ایشلر وزیرلیگی مطبوعات سۉزلاوچیسی اۉرینباسری ضیا احمد تکل، بو گروه تهرانده افغانستان بۉییچه اۉتکزیلهدیگن منطقوي ییغیلیشگه تکلیف قیلینگنینی، اما اونده اشتراک اېتمسلیکلرینی ایتدی.
او طالبان نظارتیدهگی افغانستان ملی تلویزیونیگه بېرگن مصاحبهسیده، اوشبو ییغیلیشگه قتنهشمسلیک سببی حقیده انیق ایضاح بېرمهدی.
طالبان تشقی ایشلر وزیرلیگی مطبوعات سۉزلاوچیسی اۉرینباسری نینگ ایتیشیچه، بو گروه منطقوي تشکیلاتلر و فورمتلر، شونینگدېک ایکّی تامانلهمه میکانیزملر آرقهلی منطقه دولتلری بیلن فعال علاقهلرگه اېگه و بو بارهده معلوم یوتوقلرگه اېریشیلگن.
«تشقی ایشلر وزیرلیگی منطقهده موجود فورمتلرنی مستحکملش آرقهلی اۉز ارا توشونیش و منطقوي همکارلیکنی رواجلنتیریشگه ایشانهدی.» دېب تیلگه آلگن تکل.
مذکور هفته تهران افغانستان بۉییچه منطقوي ییغیلیشگه مېزبانلیک قیلیشی کوتیلماقده. اونده منطقه دولتلری نمایندهلری اشتراک اېتهدی.
اېران تشقی ایشلر وزیرلیگی مطبوعات کاتبی اسمایل بقایی نینگ ایتیشیچه، اوشبو ییغیلیشده پاکستان، تاجیکستان، اۉزبېکستان، تورکمنستان، چین و روسيه دولتلری نینگ افغانستان بۉییچه مخصوص وکیللری قتنهشهدی.
بقایی بو ییغیلیش قۉشنی دولتلر و باشقه منطقوي تامانلر بیلن تورلی درجهلرده آلیب باریلگن مصلحتلشوولر نتیجهسی اېکنینی ایتیب، اوشبو تشبث منطقوي یقینلشوونی کوچهیتیریش و ضدیتلرنی کمهیتیریشده ثمرهلی رۉل اۉینشیگه امید بیلدیردی.
اونینگ قۉشیمچه قیلیشیچه، ایران اسلام جمهوریتی قۉشنیچیلیک حدودیده خوفسیزلیک و برقرارلیککه مهم اهمیت بېرهدی و شو یۉلده منطقه دولتلری اۉرتهسیدهگی کېسکینلیکنی کمهیتیریش همده اۉزارا توشونیشنی مستحکملش اوچون هېچ قندهی سعی-حرکتدن تيیلمهیدی.
ایران تشقی ایشلر وزیرلیگی مطبوعات سۉزلاوچیسی طالبان اوشبو ییغیلیشگه تکلیف اېتیلگن-اېتیلمهگنینی انیقلشتیرمهدی.
بو، طالبان و پاکستان اۉرتهسیدهگی کېسکینلیک و تۉقنهشوولر کوچهیگنیدن کېین افغانستان بۉییچه اۉتکزیلهیاتگن اېنگ سۉنگگی منطقوي ییغیلیش حسابلنهدی.
ایران تشقی ایشلر وزیرلیگی حاضرچه اوشبو ییغیلیشنینگ کون ترتیبی حقیده معلومات بېرمهگن.
