غزنی ولایتینینگ مالستان اولسواللیگیدهگی منبعلرنینگ معلوم قیلیشیچه، طالباننینگ امر به معروف و نهی منکر خادملری میر آدینه قیزلر لیسهسی مدیری، اوشبو لیسهنینگ بیر نفر اۉقیتووچیسی همده انگلیس تیلی اۉقوو مرکزی مدیرینی حبسگه آلگن.
منبعلرگه کۉره، اوشبو اوچ کیشی بوگون (شنبه ۲۳ قوس) میر آدینه قیزلر لیسهینی قَیته ترمیملش بۉییچه خلق لایحهسی نینگ آچیلیش مراسمی وقتیده حبسگه آلینگن. اولرنینگ حبسگه آلینیشی سببی صفتیده مراسمده قیز اۉقووچیلرنینگ اشتراکی کۉرسهتیلگن.
منبعلر اطلاعات روزگه ایتیشیچه، امر به معروف خادملری دستلب میر آدینه قیزلر لیسهسی مدیری بۉستان علی فیاضگه مراسمده قتنهشهیاتگن اۉقووچیلر صفینی باشقه اشتراکچیلردن اجرهتیش حقیده بویروق بېرگن. بیراق بیر نېچه دقیقهدن سۉنگ ینه واقعه جاییگه قَیتیب، فیاض، لیسه اۉقیتووچیسی اعتمادي و انگلیس تیلی اۉقوو مرکزی مدیریرفیروزه رضاينی حبسگه آلیب، اولسواللیک مرکزیگه آلیب کېتیشگن.
منبعلرنینگ قۉشیمچه قیلیشیچه، قیشلاق اهالیسی و آقسقاللر حبسگه آلینگنلرنی آزاد قیلیش اوچون اولسواللیک حاکمیتیگه مراجعت قیلگن، بیراق اولرنینگ سعی-حرکتلری ثمره بېرمهگن.
امر به معروف خادملری فیاض، اعتمادي و فیروزه رضايی بیر کېچه-کوندوز حبسده سقلنیشینی بیلدیرگن.
منبعلرگه کۉره، بوگون میر آدینه قیزلر لیسهسینی قَیته ترمیملش لایحهسی فایدهلنیشگه تاپشیریلیشی رېجهلشتیریلگن اېدی.
مذکور لایحه «همياری جماعهسی» تامانیدن عملگه آشیریلهیاتگن ایکّینچی خلق لایحهسی بۉلیب، اونینگ مقصدی قیزلر اوچون یخشیراق تعلیم شرایطلرینی یرهتیش دېب اعلان قیلینگن.
