پاکستان باش وزیری شهباز شریف تورکيه جمهور رییسی رجب طیب اردوغان بیلن اوچرهشووده افغانستانده طالبان بیلن تینچلیک فقط پاکستان خوفسیزلیک تشویشلری تۉلیق برطرف اېتیلگنده ممکنلیگینی تأکیدلهگن.
پاکستان باش وزیرلیگی ادارهسی خبریگه کۉره، اوشبو اوچرهشوو بوگون( جمعه ۲۱ قوس) ترکمنسان نینگ عشق آباد شهریده بۉلیب اۉتگن خلق ارا «تینچلیک و ایشانچ» ییغیلیشی دایرهسیده تشکیل اېتیلگن.
شهباز شریف اوچرهشووده طالبان و پاکستان اۉرتهسیدهگی مذاکرهلرنی آسانلشتیریشدهگی تورکيه رۉلینی یوقاری بهالهگن.
پاکستان و طالبان جاري ییل اکتوبر آییده، تخمیناً بیر هفتهلیک تۉقنهشوودن سۉنگ، قطر و تورکيه واسطهچیلیگیده تۉختاوگه کېلیشگن.
تامانلر کېینچهلیک دوحهده یکوني کېلیشووگه اېریشیش بۉییچه مذاکرهلرنی باشلهگن و استانبولده دوام اېتتیریشگن. اما اوچ دور مذاکره نتیجهسیز یکونلنگن و یکوني کېلیشووگه اېریشیلمهگن.
پاکستان افغانستان توپراغیدن طالبان نینگ پاکستاندهگی گروهلریگه (تیتیپی) قرشی هجوملرنی آلدینی آلیشنی طلب قیلماقده.
اما طالبان افغانستانده تیتیپینینگ موجودلیگینی رد اېتهدی و پاکستان نینگ اوشبو گروه هجوملرینی تۉختهتیش بۉییچه طلبینی منطقسیز دېب بیلهدی.
حاضرگی وقتده ایکّی تامان اۉرتهسیدهگی سیاسي مناسبتلر هنوز کوچلی ترنگلیکده و تخمیناً ایکّی آیدن بېری چېگره اۉتیش یۉللری یاپیق، تجارت اېسه تۉختهتیلگن.
