دنیا نینگ 56 دولتی نمایندهلر بیرگهلیکده اعلان قیلگن بیاناتده افغانستانده طالبلر تامانیدن انسان حقوقلرینینگ کېنگ کۉلمده و تیزیملی طرزده آیاق آستی بولیشینی قارهلهدیلر.
بوگون(چهارشنبه ۱۹ قوس) اعلان قیلینگن اوشبو بیاناتده ایتیلیشیچه، طالبلرنینگ کمسیتووچی سیاستی و عملیاتلری افغانستانده دنیانینگ اېنگ آغیر انسان حقوقلری رېکوردلریدن بیرینی یرهتگن.
اولر خصوصاً افغانستاندهگی عیاللر و قیزلر نینگ احوالیگه تۉختهلیب، عیاللر و قیزلر «نهادیلشتیریلگن جنسي اجرهتیش تیزیمی، چېکلاولر و انساني مرتبهسی نینگ پایمال قیلینیشی» بیلن یوزمه-یوز اېکنینی تأکیدلهدیلر.
بیاناتگه کۉره، تعلیم، ایش، حرکتلنیش اېرکینلیگی و سیاسي همده اجتماعي حیاتده اشتراک اېتیشگه قۉییلگن قطعي چېکلاولر نهفقط عیاللر و قیزلرنینگ کېلهجگینی اۉغیرلهماقده، بلکه افغانستاننی اقتصادي و اجتماعي رواجلنیشدن محروم قیلماقده، شو بیلن بیرگه انسان حقوقلریگه چوقور هجوم صفتیده بهالنهدی.
اولر، شونینگدېک، ژورنالیستلر و مدنی جمعیت اعضالرینینگ باستیریلیشی، اېتنیک و مذهبی آزچیلیکلرنینگ نشانگه آلینیشی، عامهوي قتل و جسماني جزالر، اۉزباشیمچه حبسلر حقیده گپیریب، بو برچه سوءاستعماللر جزادن مطلقا خالی طرزده عملگه آشیریلهیاتگنینی ایتدیلر.
مذکور نمایندهلرنینگ تأکیدلشیچه، بو عمللر نهفقط افغانستان نینگ خلق ارا مجبوريتلرینی بوزهدی، بلکه مملکت نینگ برقرار تینچلیک، خوفسیزلیک و فراوانلیک استقبالینی هم ایزدن چیقرهدی.
اولر طالبلرنی، «درحال برچه حقوقبوزرلیکلرنی، اینیقسه عیاللر و قیزلرگه قرشی جاري اېتیلگن برچه چېکلاولرنی بېکار قیلیشگه، مستقل ملي و خلق ارا مانیتورینگ میکانیزملری نینگ اېرکین فعالیتیگه یۉل آچیشگه» چقیردیلر.
طالبلر حاکمیتنی قَیته اېگهلهگنیدن بېری کېنگ کۉلمده انسان حقوقلرینی، خصوصاً عیاللر و قیزلرنینگ حقوقلرینی بوزیشده عیبلنیب کېلماقده.
بو گروه عیاللرنی تعلیم و ایش امکانیتیدن محروم اېتیب، جمعیتدهگی اشتراکینی کېسکین چېکلهگن. شونینگدېک، قومی و مذهبی آزچیلیکلرنی باستیریش، همده سابق مسووللر و حربيلرنی ناقانوني حبس قیلیش و اۉلدیریش کبی عیبلاولر هم موجود.
