بیرلشگن ملتلر تشکیلاتینینگ افغانستاندهگی یاردم ادارهسی (یوناما) «خلق ارا انسان حقوقلری کونی» مناسبتی بیلن بېرگن بیاناتیده، عیاللر و قیزلر ساغلیقنی سقلش، ایش تاپیش و اجتماعي حیاتده اشتراک اېتیش بارهسیده دایمي و کېسکین چېکلاولرگه دوچ کېلماقده دېگن.
یوناما بوگون(چهارشنبه ۱۹ قوس) اعلان قیلگن بیاناتیده ایتیلیشیچه، بو چېکلاولر عیال و قیزلرنینگ اساسي حقوقلرینی همده افغانستاننینگ کېلهجگینی ضعیفلشتیرهدی.
یوناما طالبلر تامانیدن عیاللرنینگ طبي خدمتلرگه اېریشیشنی چېکلشگه اشاره قیلیب، طبي خدمتلرنینگ یېترلی بۉلمسلیگی عایلهلرنی حمایهسیز، جمعیتلرنی اېسه کوچسیز حالگه کېلتیرهیاتگنینی ایتدی.
یونامانینگ تأکیدلشیچه، طالبلر انسان حقوقلری بۉییچه خلق ارا مجبوريتلرگه یقینلشیشی کېرهک.
بیرلشگن ملتلر تشکیلاتینینگ اوشبو ادارهسی بو ایش نهفقط گلابل معیارلرگه ماسلشیش، بلکه مملکت و خلق نینگ تینچلیک، برقرارلیک و رواجلنیش سری عملي یۉلی اېکنینی بیلدیردی.
بیرلشگن ملتلر تشکیلاتینینگ افغانستاندهگی وکالتخانهسی سرپرستی جورجت گانیون، «انسان حقوقلری اختیاري مسأله اېمس. بو کوندهلیک حیاتنی دوام اېتتیریش اوچون ضرور بۉلگن حقوقلر دیر.»
اونینگ قۉشیمچه قیلیشیچه، «افغانستانده عیاللر و قیزلرنینگ اۉقیشی، ایشلشی و تۉلیق اشتراک اېتیشی تأمینلنیشی جوده مهم. حاکمیتدهگی رهبرلردن خلق ارا مجبوريتلرگه ماسلشیش و افغانستان همده اونینگ خلقینینگ رونق تاپیشی اوچون امکان یرهتیشده قطعي قدملر تشلشنی سۉرهیمیز.»
بیرلشگن ملتلر تشکیلاتینینگ افغانستانده عالي کمیسارلیگی نمایندهسی فیونا فریز، «تعلیم، ساغلیق، تیریکچیلیک و حقوقي اېرکینلیک کبی کوندهلیک احتیاجلر هر بیر افغانگه تأمینلنیشی لازم بۉلگن حقوقلردیر. اما کۉپلب افغانستانلیک، خصوصاً عیاللر و قیزلر بو حقوقلردن محروملر دېدی.»
اونینگ سۉزلریگه کۉره، «انسان حقوقلری افغانستان ترقیاتینینگ مرکزیده بۉلیشی کېرهک، چونکه بو حقوقلر تیریکچیلیک و امید اۉرتهسیدهگی کۉپریک وظیفهسینی بجرهدی.»
طالبلر حاکمیتنی قَیته اېگهلگنیدن بېری کېنگ کۉلمده انسان حقوقلرینی بوزیشده عیبلنیب کېلهدی.
جملهدن، بو گروه عیاللر و قیزلرنینگ حقوقلرینی قۉپال روشده پایمال قیلگنی، اولرنی تعلیم و ایشلشدن محروم قیلگنی اوچون تنقید آستیده.
شونینگدېک، طالبلر قومی آزچیلیکلر و مذهبی گروهلرنینگ حقوقلرینی باستیریشده هم عیبلنهدی.
