بیرلشگن ملتلر تشکیلاتینینگ انسانپرورلیک یاردملرینی موافقلشتیریش ادارهسی (اوچا) افغانستانده آزیق-آوقت خوفسیزلیگی کېسکین یامانلشهیاتگنینی بیلدیریب، کېلهسی میلادي ییلده ۱۷.۴میلیون کیشی آغیر آزیق-آوقت تنقیصلیگی بیلن یوزمه-یوز بۉلیشی کوتیلهیاتگنینی اَیتماقده.
اوچا بوگون(دوشبنه ۱۷ قوس) اعلان قیلگن گزارشیگه تأکیدلشیچه، شولرنینگ ایچیدن ۵.۲میلیون کیشی آزیق-آوقت خوفسیزلیگینینگ فوق العاده درجهسیده بۉلهدی.
ادارهنینگ ایتیشیچه، بو رقملر جاري ییلده قید اېتیلگن مقداردن ایکّی برابر کۉپدیر.
بیرلشگن ملتلر تشکیلاتینینگ باشقه ادارهلریهم افغانستانده آزیق-آوقت تنقیصلیگی و آچلیکنینگ کېنگهییب بارهیاتگنیدن آگاهلنتیرگن.
بوتون دنیا آزیق-آوقت دستوری تیناوون اعلان قیلگن بیاناتیده افغانستانده آزیق- آوقت خوفسیزلیگی و بالهلر-عیاللر اۉرتهسیدهگی تۉییب آوقتلنمسلیک خواطرلی تېزلیکده آرتیب بارهیاتگنینی قید اېتدی.
دستورنینگ آگاهلنتیریشیچه، قیش موسمیده عیاللر و بالهلر آرهسیده تۉییب آوقتلنمسلیک احتمالی ینه-ده آشهدی و سۉنگگی ییللرده کوزهتیلمهگن درجهگه یېتیشی ممکن.
بیرلشگن ملتلر تشکیلاتینینگ گزارشیگه کۉره، جاري ییلده 5 یاشگچه بۉلگن ۳ میلیون باله همده ۱ میلیون ۲۰۰مینگدن آرتیق حاملهدار و اېمیزیکلی عیاللر آغیر تۉییب آوقتلنمسلیک بیلن کورهشماقده.
بیرلشگن ملتلر تشکیلاتینینگایتیشیچه، افغانستاندهگی یوقاری درجهدهگی آزیق-آوقت خوفسیزسیزلیگی اساسا ضعیف اقتصادی و قورغاقچیلیک کبی فلاکتلر عاقبتیده یوزهگه کېلگن بۉلیب، بو حالت میلیونلب آدملر نینگ حیاتیگه تأثیر کۉرستماقده.
طالبان حاکمیتگه قَیتگچ، مملکتده قشّاقلیک و ایشسیزلیک آشگن، بیر پیت نینگ اۉزیده انسانپرورلیک یاردملر اېسه کمهیگن.
نتیجهده میلیونلب آدملر یېترلی طعامگه اېگه بۉلمهی، آزیق-آوقت تنقیصلیگی و تۉییب آوقتلنمسلیک دامیگه توشیب قالگن.
