بیرلشگن ملتلر تشکیلاتینینگ افغانستان بۉییچه مخصوص انسان حقوقلری گزارشگلر ریچارد بنت طالبان تامانیدن «امارتي» دېب اعلان قیلینگن غزنی نینگ نوآباد شهرچهسیدن هزارهلر کۉچیریلیشی نینگ آلدینی آلیشنی طلب قیلدی.
بنت قطر سفرینینگ یکونیده اعلان قیلگن بیاناتیده ایتیشیچه، او شو هفته نسللر دوامیده غزنی شهرینینگ بیر منطقهسیده یشب کېلهیاتگن و طالبان محکمهسی نینگ قرارلری سبب اویلریدن محروم بۉلیش خوفی آستیده قالگن بیر گروه هزارهلر بیلن صحبتلشگن.
اونینگ سۉزلریگه کۉره، نوآباد شهرچهسی اهالیسی محکمه جریانلرینینگ عدالتلی اېمسلیگی و اگر اویلرینی بۉشهتیشگه مجبور قیلسهلر، تخمیناً ۱۳ مینگ ته عایله قندهی تقدیر کوتهیاتگنی بارهسیده جدّي خواطر بیلدیرگن.
بیرلشگن ملتلر تشکیلاتینینگ مخصوص گزارشگری اوشبو عایلهلرنینگ کۉچیریلیشی نینگ آلدینی آلیش اوچون چارهلر کۉریشنی طلب قیلدی و عدالتلی محکمه جریانی، شونینگدېک حقوقي یاردم کۉرستیش ضرورلیگینی تأکیدلهدی.
بوندن بیر آی آلدین طالباننینگ عدلیه وزیرلیگی مخصوص محکمهسی غزنی مرکزیدهگی نوآباد شهرچهسی نینگ بیرمینگ۸۴۳جریب یېر میدانینی «امارتي» دېب اعلان قیلگنینی بیلدیردی.
اطلاعات روز گزېتهسینینگ تېکشیروویگه کۉره، مذکور شهرچه ۳۲ ییل آلدین برپا اېتیلگن و حاضر او یېرده تخمینا ۱۸ مینگ عایله استقامت قیلهدی.
گزارش، شونینگدېک، نوآباد اهالیسی بیلن محکمه قیلهیاتگن تامان طالبان نینگ عدلیه وزیری عبدالحکیم شرعي اېکنینی کۉرستهدی.
نوآباد اهالیسینینگ ایتیشیچه، اولر اوشبو یېرلرنی پولگه ساتیب آلیب، اویلر قورگن، بیراق طالبان اولرنینگ یېرگه بۉلگن ملک حقوقینی تن آلمهی، شهرچهنی بۉشهتیش بویروغینی چیقرگن.
اطلاعات روزنینگ خلاصهلریگه کۉره، اهالی نینگ حجتلری تۉلیق و تۉغری کۉریب چیقیلمهگن.
