بیرلشگن ملتلر تشکیلاتینینگ بالهلرنی حمایه قیلیش جمغرمهسی (یونیسف) کنر ولایتینینگ زلزله تأثیریگه اوچرهگن منطقهلریده تۉرت باله «یوتل و ساووقلیک» سبب وفات اېتگنینی معلوم قیلدی.
یونیسف بیاناتیگه کۉره، اوشبو بالهلر سۉنگّی هفته آخریده کنر ولایتی، نورگل اولسواللیگیده «زری بای» قاچقینلر کمپیده وفات اېتگن.
بالهلر آرهسیده اوچ یشر اۉغیل تقوا، تۉقّیز آیلیک قیز عثمانی شولات درهسیدن، ایکّی یریم یشر ذاکره و سکّیز آیلیک عبدالله کنرولایتینینگ نورگل اولسواللیگی «ماماگل» درهسیده بۉلگن.
یونیسفنینگ معلوم قیلیشیچه، افغانستاننینگ زلزله تأثیریگه اوچرهگن منطقهلریده ۲۷۰مینگ باله ساووققه باغلیق کسللیکلرگه دچار بۉلیش خوفی آستیده.
اوشبو حدودلرده کېچهسی هوا حرارتی صفر درجهدن پستگه توشهدی و بعضاً -۲۵ درجهگچه کمهییشی ممکنلیگی قید اېتیلگن.
یونیسفنینگ افغانستاندهگی مسوولی تاجالدین اویواله، بالهلرنینگ ساغلیگی و خوفسیزلیگی حقیده چوقور تشویش بیلدیرگن، چونکه زلزله اولرنینگ اویلرینی ویران قیلگن و اولر قاچقین حالیگه توشگن.
یونیسف شونینگدېک همکارلر و دونرلرنی «بالهلرنی ایسّیق و خوفسیز سقلش اوچون زودلیک بیلن قیشگی یاردمنی یېتکزیش»گه چقیرگن.
تخمیناً اوچ آی آلدین افغانستان شرقیدهگی ولایتلرنی زلزله لرزهگه کېلتیرگن و اېنگ کتّه تلفات و ضرر کنر ولایتیده کوزهتیلگن.
اوشبو زلزله نتیجهسیده تخمیناً ایکّی مینگ کیشی وفات اېتگن و مینگلب اویلر ویران بۉلگن. اویلرنینگ ویران بۉلیشی یوزلب عایلهلرنی قاچقین حالیگه کېلتیرگن و اولر وقتینچهلیک کمپلرده یششگه مجبور بۉلگن.
