پاکستان تجارت وزیرلیگی افغانستانگه بیرلشگن ملتلر تشکیلاتینینگ انسانپرورلیک یاردمی یوکلرینی یېتکزیش اوچون تورخم و چمن چېگره اۉتیش یۉللرینی آچیشینی معلوم قیلدی.
جیو نیوز خبریگه کۉره، اوشبو وزیرلیک تیناوون (چارشنبه، ۱۲ قوس) بونی پاکستان تشقی ایشلر وزیرلیگی بیلن مصلحتلشگن حالده قرار قیلگنینی بیلدیرگن.
مذکور خبرگه کۉره، پاکستان تجارت وزیرلیگی یونیسف، بوتونجهان آزیق-طعام دستوری و بیرلشگن ملتلر تشکیلاتی اهالی فوندیگه تېگیشلی یوک موترلرینی افغانستانگه استه-سېکین اۉتکزیشنی معقولهگن.
دستلبکی باسقیچده افغانستانگه آزیق-طعام یوکلرینی یېتکزهیاتگن یوک موترلریگه رخصت بېریلهدی، ایکّینچی باسقیچده دارو-درمان و طبي جهازلر، اوچینچی باسقیچده اېسه باشقه ضرور ماتریاللر، جملهدن اۉقووچیلر و اۉقیتووچیلر اوچون اۉقوو بستهلرینی یېتکزووچی یوک موترلری چېگرهدن اۉتیشیگه رخصت بېریلهدی.
پاکستان تجارت وزیرلیگی مملکت نینگ سودا، ترانزیت و فدرال سالیق باشقرمسیدن اوشبو یوکلرنی تېزکارلیک بیلن رسميلشتیریشنی سۉرهگن، شونده انسانپرورلیک یاردملری تورخم و چمن یۉللری آرقهلی کېچیکتیریلمسدن یېتکزیلیشی ممکن بۉلهدی.
حاضرچه اوشبو یوکلرنی پاکستاندن افغانستانگه اۉتکزیش جریانی قچان باشلنیشی انیق اېمس.
بوندن آلدین، بیرلشگن ملتلر تشکیلاتینینگ افغانستاندهگی یاردم بۉلیمی (یوناما) نمایندهسی جورجت گانیون طالبان تشقی ایشلر وزیری بیلن اوچرهشگنده، چېگره اۉتیش یوللرینینگ یاپیلیشی طفیلی مینگلب تُن انسانپرورلیک یاردمی چېگره آرتیده قالیب کېتگنینی بیلدیرگن اېدی.
پاکستان ۱۲ آکتبرده طالبان بیلن کېلیشماوچیلیکلر نتیجهسیده افغانستان بیلن چېگره اۉتیش یۉللرینی یاپگن اېدی.
حاضرده فقط پاکستاندن چیقریلهیاتگن مهاجرلر چېگره آرقهلی اۉتیشگه رخصت بېریلهدی، ایکّی مملکت آرهسیدهگی باشقه هر قندهی حرکت تۉختهتیلگن.
