اوچ نفر تاجیک خوفسیزلیک منبعسی رویترز خبرآژانسیگه، تاجیکستان افغانستان بیلن چېگرهلرینی حمایه قیلیش اوچون روسیهدن یاردم سۉرهگنی حقیده بیلدیردی.
تاجیکستان خوفسیزلیک کېنگشیدهگی بیر منبعنینگ رویترزگه، مملکت رسميلری روسيه بیلن مسکونینگ تاجیکستاندهگی حربي قرارگاهیدن قۉشین جایلشتیریش مسألهسینی تاجیکستان و افغانستان چېگرهسیده قۉشمه گیزمه تشکیل اېتیش اوستیده بحث قیلگنلرینی معلوم قیلدی.
تاجیکستاندهگی روسيه حربی قرارگاهی، روسيهنینگ چېت اېلدهگی اېنگ ییریک حربي قرارگاهلردن بۉلیب، پایتخت دوشنبه یقینیده جایلشگن.
اوشبو منبع رویترزگه: «حاضر مذاکرهلر کېتماقده. اۉیلهیمنکی، بو هفته بو بارهده قرار قبول قیلینهدی»، دېگن.
تاجیکستان دولت ملي خوفسیزلیک کمیتهسینینگ ینه ایکّی منبعسی هم روسيه بیلن مذاکرهلر آلیب باریلهیاتگنینی تصدیقلهگن و کېلیشووگه اېریشیلسه، روسيه افغانستان بیلن ۱۳۴۴ کیلومتر (۸۳۵ مِیل)لیک چېگره بۉیلب گیزمهگه تیک اوچرلر بیلن یاردم بېریشینی ایتگن.
تاجیکستان دایما افغانستان شِمالیدهگی بېقرارلیک حقیده خواطر بیلدیریب کېلهدی.
اۉتگن هفته افغانستاندن عملگه آشیریلگن هجوملر عاقبتیده چېگره یقینیده بېش نفر چین وطنداشی هلاک بۉلگن و ینه بېش کیشی جراحت آلگن.
تاجیکستان جمهور رییسی امام علی رحمان دوشنبه کونی خوفسیزلیک ادارهلری رهبرلری بیلن وضعیتنی محاکمه قیلگن.
چین اېسه تاجیکستانده تورلی کانچیلیک و سودا فعالیتلری بیلن شغللنووچی وطنداشلریگه درحال چېگره حدودینی ترک اېتیشنی توصیه قیلگن.
طالبان تشقی ایشلر وزیری امیرخان متقی تاجیکستان تشقی ایشلر وزیری بیلن تیلفون آرقهلی گپلشیب، «افغانستان و تاجیکستان یقینده سیاسي، اقتصادي و خوفسیزلیک بۉییچه ایشانچلی همکارلیک محیطی یرهتدی، اما اَیریم دایرهلر بو ایجابي جریاننی ضعیفلشتیریشگه اورینماقده»، دېگن.
متقینینگ قۉشیمچه قیلیشیچه: طالبان چېگرهده خوفسیزلیکنی کوچهیتیریشگه، قۉشمه تېرگاو اۉتکزیشگه و هر قندهی هماهنگلیککه تیار. اونینگ ایتیشیچه، یاووز گروهلرگه قرشی قۉشمه چارهلر کۉریش ضرور.
