طالباننینگ فراهدهگی امنیه قوماندانلیگی،۱۰ نفر افغانستان وطنداشی ایرانگه ناقانوني یۉل بیلن اۉتیشگه اورینیش چاغیده اۉشه مملکت چېگرهچیلری تامانیدن اۉلدیریلگنینی تصدیقلهدی.
طالبلرنینگ فراهدهگی امنیه قوماندانلیگی سۉزلاوچیسی محمد نسیم بدری، بوگون (سهشنبه، ۱۱ قوس) بو شخصلر فراهدهگی ابونصر اۉتیش یۉلی آرقهلی ناقانوني طرزده ایرانگه کیریشگه حرکت قیلگنلیکلرینی معلوم قیلدی.
او ایرانگه ناقانوني یۉل بیلن کېتماقچی بۉلگن شخصلر سانینی انیق کۉرستمهگن، اما ینه ایکّی کیشی یۉقالگنینی قۉشیمچه قیلگن.
آلدینراق محلي منبعلر اطلاعات روزگه، ایران چېگرهچیلری فراه ولایتی چېگره حدودیدهگی 35 نفر افغانستان وطنداشیدن عبارت گروهگه اۉت آچگن و کمیده ۱۲ نفر هلاک بۉلگن اېدی دړب خبر بېرگن اېدی.
منبعلرنینگایتیشیچه، بو شخصلر اوشبو هفته یکشنبه کونی فراهدهگی 78-میل چېگره آرقهلی ایرانگه اۉتماقچی بۉلگن و شونده اۉت آچیلگن.
منبعلرنینگ بیلدیریشیچه، هلاک بۉلگنلرنینگ جسدلری فراه ولایت شفاخانهسیگه آلیب کېلینگن، باشقه شخصلرنینگ تقدیری اېسه نامعلوم.
اېران رسميلری حاضرگچه افغانستان وطنداشلریگه اۉت آچیلیشی و اۉلدیریلیشی بارهسیده ایضاح بېرمهگن.
آلدین هم ایران چېگرهچیلرینینگ افغانستان وطنداشلریگه قرشی اۉت آچیشی بۉییچه بیر نېچته حالتلر قید اېتیلگن.
ایران ویزه بېریش جریانی تۉختهتیلگنیدن سۉنگ، مملکتنینگ بیر قنچه وطنداشلری ناقانوني یۉل بیلن اۉتیشگه حرکت قیلماقده.
طالبان سۉنگگی آیلر ایچیده ایرانگه ناقانوني یۉل بیلن کېتیشگه اورینهیاتگن یوزلب یشاوچینی حبسگه آلگنی حقیده خبر بېرگن.
