فراه ولایتیده محلی منبعلرنینگ ایتیشیچه، افغانستان وطنداشلریدن عبارت ۳۵کیشیلیک بیر گروه ایرانچی، ایران چېگرهسیدن قاچاقی اۉتیش نیتده بۉلگنده، یکشنبه (۹قوس) «۷۸میل» چېگره حدودیده بو مملکت چېگرهچیلری آرقلی اۉققه توتیلگن. نتیجهده ۱۲ کیشی ایرانچی اۉلدیریلگن.
منبعلرنینگ بیلدیریشیچه، هنوزگچه۱۲ کیشینینگ جسدی تاپیلگن و قالگن کیشیلرنینگ سرنوشتیدن هیچ قندهی خبر یۉق. جسدلر فراه ولایتی شفاخانهسیگه یېتکزیلگن.
فراهده طالبلر محلی مسووللری بو تۉغریده هنوزگچه بیر نرسه دېمهگن.
بوندن آلدین هم افغانستانلیکلر ایران چېگرهچیلری تامانیدن اۉققه توتیلگنی بارهسیده گزارش قیلینگن. ایران ویزهسی صادر قیلینیش جریانی تۉختهتیلگندن سۉنگ، افغانستان وطنداشلرینینگ کۉپینچهسی قاچاق یۉللری آرقهلی ایرانگه اۉتیب بارهدیلر.
باشقه تاماندن طالبلر اېسه سۉنگّی آیلرده قاچاق یۉلی بیلن ایرانگه کېتیش نیتده بۉلگن یوزلب افغانستان وطنداشی اوشلب آلیگنیدن خبر بېرگن.
