طالبلرنینگ اېکینچیلیک، چارواچیلیک و سوغاریش وزیرلیگی، ایران نینگ ۶۵ کیشیلیک بیر هیئاتی اېکینچیلیک ساحهسیده همکارلیکنی کېنگهیتیریش، صادرات- وارداتنی آشیریش و سرمایه امکانیتلرینی اۉرگنیش مقصدیده هرات ولایتیگه کېلگن.
اوشبو وزیرلیک بوگون( یکشنبه ۹ قوس) نشر قیلگن بیاناتیده، هیات هراتدهگی اېکینچلیک و فارمدارلر بیلن اوچرهشگن و «مهم و عملي کېلیشوولرگه اېریشگن.»
وزیرلیک بو کېلیشوولرنینگ تفصیلاتلرینی معلوم قیلمهگن.
اما حاضر طالبان نظارتیدهگی افغانستان ملي تلویزیونی هرات اېکینچلیک و چارواچلیک اوتاقی باشلیغی بشیراحمد بهادری سۉزلریگه اساسلب، تامانلر قۉشمه سهامی شرکت تشکیل اېتیشگه کېلیشیب آلگنینی خبر قیلگن.
اوشبو یېتکرمهنینگ شونینگدېک، اېران هیاتینینگ بیر اعضاسیگه تیهنیب یازیشیچه، ینگی کېلیشووگه کۉره، افغانستانده اېران متخصصلری تامانیدن اېکینچلیک محصولاتلرینی تخنیکي اۉقیتیش و اېکین رېجهلری عملگه آشیریلهدی.
ایران رسميلری آلدینراق طالبان بیلن «چېتدن اېکین اېکیش» مسألهسیده کېلیشووگه اېریشگنینی بیلدیرگن.
سۉنگّی ییللرده ایراننینگ شرقي ولایتلری قورغاقچیلیک بیلن دوچ کېلگن و نتیجهده مملکت اوچون ضرور بۉلگن کۉپلب اېکینچیلیک محصولاتلری یېتیشتیریلمهیپتی.
ایران چېتدن اېکین اېکیش و افغانستان توپراغیدن فایدهلنیش آرقهلی ضرور محصولاتلرینی تأمینلهماقچی.
