پاکستاننینگ باش وزیر اۉرینباسری و تشقی ایشلر وزیری محمداسحاق دار، افغانستاندهگی طالبان پاکستان طالبان حرکتی (تیتیپی) نینگ۱۰۰ دن آرتیق اعضاسینی قۉلگه آلگن، بیراق بو یېترلی اېمس دېگن.
بوگون (شنبه۸ قوس) اونینگ ایتیشیچه، جاري ییل باشیده کابلگه قیلگن سفریده طالباننینگ تشقی ایشلر وزیری امیرخان متقي اونگه بو حقده ایتگن.
پاکستان تشقی ایشلر وزیرینینگ قۉشیمچه قیلیشیچه، طالبان بو حبسگه آلینگنلرنی تصدیقلش اوچون اسلام آباددن بیر هیئت کابلگه یوباریلیشینی سۉرهگن.
افغانستان توپراغیدن فعالیت یوریتهیاتگن تیتیپی اعضالریگه قرشی انچه قطعي و برقرار چارهلر کۉریش ضرور دېب تاکیدلهیدی او.
پاکستان رسميلری تیتیپی نینگ اعضالری و رهبرلری افغانستانده جایلشگنینی و بو مملکتدن پاکستانگه قرشی فایدهلنهیاتگنینی ادعا قیلهدی.
اولر افغانستاندهگی طالبلردن «ترورچیلر» اوچون افغانستان توپراغیدن پاکستانگه قرشی فایدهلنیلیشیگه یۉل قۉیمسلیکنی طلب قیلیب کېلماقده.
اما طالبان اېسه هېچ بیر گروهگه افغانستان توپراغیدن باشقه بیر دولتگه قرشی حرکت قیلیشگه رخصت بېرمسلیکلرینی تأکیدلب کېلهدی.
شونینگدېک، اولر تیتیپی افغانستانده اېمس، بلکه پاکستانده جایلشگنینی و اۉشه یېرنینگ اَیریم منطقهلرینی اۉز نظارتی آستیده سقلب تورگنینی ایتهدیلر.
