پاکستاننینگ افغانستان بۉییچه سابق نمایندهسی آصف درانی اۉزینینگ سۉنگّی بیاناتیده «پاکستانده هېچ کیم طالبانچه اسلامنی ایستهمهیدی»، دېب ایتگن.
او بوگون (پنجشنبه، ۶ قوس) ایکس اجتماعی ترماغیده یازگن پیامیده«طالبلر و پاکستانلیکلر اۉرتهسیدهگی مفکوروي تفاوت جوده یارقین؛ پاکستانده هېچ کیم طالبلر اسلامینی خواهلهمهیدی دېگن. شونینگ اوچون پاکستانلیکلرنینگ حکمی انیق؛ اېندی طالبلر بیلن عاشقانه مناسبتنی دوام اېتتیرمنگ.»
پاکستان و طالبان ایلگری بیر-بیریگه جوده یقین بۉلگن بۉلسه-ده، آخرگی تۉرت ییل ایچیده مناسبتلر کېسکین ترنگلشگن.
اسلام آبادنینگ ایتیشیچه، افغانستاندهگی طالبان پاکستاندهگی قوراللی گروهلر، جملهدن پاکستان طالبان حرکتی (تیتیپی)گه باشپناه بېرگن و بو گروه افغانستان توپراغیدن پاکستانگه قرشی هجوملر اوچون فایدهلنماقده.
پاکستان حکومتی بیر نېچه بار طالبلردن تیتیپینی جلولشنی طلب قیلگن، بیراق طالبلر اېسه: «تیتیپی پاکستاننینگ ایچکی معماسی»، دېب جواب بېرگن.
یقینده طالبان و پاکستان پاکستان اوردوسینینگ افغانستانگه اویوشتیرگن هوا هجوملریدن کېین تۉقنهشووگه کیریشگن. بیر هفتهلیک تۉقنهشوودن سۉنگ تامانلر مذاکرهگه اۉتیرگن، اما حلی هېچ قندهی نتیجه یۉق.
طالبان–پاکستان مذاکرهلری هنوز باشی بېرک کۉچهده تورگن بیر پیتده، افغانستان–پاکستان سوداسی تۉختهتیلگن و ایکّی تامان اۉرتهسیدهگی کېسکینلیک آرتیب بارماقده.
طالبلرنینگ ایتیشیچه، پاکستان اوردوسی شو هفته هم اوچ ولایتده هوا هجوملری اویوشتیرگن و خوست ولایتیده ۱۰ کیشینینگ اۉلیمیگه سبب بۉلگن. پاکستان بو عیبلاونی رد اېتگن.
