پاکستاننینگ افغانستان بۉییچه سابق مخصوص نمایندهسی آصف درانی، بیرلشگن ملتلر تشکیلاتی خوفسیزلیک کېنگشینینگ اولرگه قرشی چیقریلگن قطعنامهسی هنوز آچیق اېکنلیگی بیلن آگاهلنتیردی و بو گروه انسان حقوقلرینی آیاق آستی قیلیش همده ترورچیلرنی قۉللب-قوّتلش سبب خلق ارا جنایي جوابگرلیککه تارتیلیشی ممکنلیگینی ایتدی.
او بوگون (چهارشنبه ۵ قوس) ایکس اجتماعی ترماغیده یازگن یازووده، طالبان رژیمیگه صمیمي مصلحتیم: بیرلشگن ملتلر تشکیلاتی خوفسیزلیک کېنگشی نینگ قطعنامهلری حلی هم اولرگه قرشی آچیق. انسان حقوقلرینی بوزیش یاکه ترورچیلرنی قۉللب-قوّتلش اوچون اولر خلق ارا محکمهگه تارتیلیشی ممکن دېگن.
بو قبیل اظهاراتلر طالبان و پاکستان اۉرتهسیدهگی کېسکینلیک تاباره کوچهییب بارهیاتگن بیر پیتده بیلدیریلماقده.
طالباننینگ ایتیشیچه، دوشنبه آقشام پاکستان اوردوسی افغانستان توپراغیگه ضربه بېرگن و هجوم عاقبتیده10 نفر تینچ اهالی هلاک بۉلگن. طالبان مطبوعات سۉزلاوچیسی ذبیحالله مجاهد بو هجومنی «جنایت» دېب اتهگن و «اۉز وقتیده جواب بېرهمیز» دېب ایتگن.
اما پاکستان اوردوسی هم، مدافعه وزیری هم طالبان نینگ «پاکستان افغانستانده هجوم قیلدی و تینچ اهالیگه ضربه بېردی» دېگن عیبلاولرینی رد اېتیب، اولرنی اساسسیز دېب بهالهگن.
پاکستاننینگ ایتیشیچه، افغانستانده طالبان پاکستانلیک جنگریلر، جملهدن تیتیپی گروهیگه باشپناه بېرگن و بو کوچلر افغانستان توپراغیدن پاکستانگه هجوملر اویوشتیرماقده.
پاکستان حکومتی بیر نېچه بار طالباندن تیتیپی اوستیدن نظارت اۉرنهتیشنی سۉرهگن، اما طالبان تیتیپی افغانستان توپراغیدن پاکستانگه هجوم قیلهیاتگنینی انکار اېتهدی.
شونگه قرهمهی، پاکستان مدافعه وزیری یقینده بو مملکت اېندی طالباندن امیدینی اوزگنینی ایتدی.
پاکستان اوردوسی مطبوعات سۉزلاوچیسی، «افغانستان طالبانی بیلن پاکستان طالبانی آرهسیده فرق یۉق دېیه تأکیدلهدی.»
