افغانستاننینگ سورگوندهگی، یېتکرمهلر اېرکینلیگینی قۉللب-قوّتلاوچی تشکیلاتی «نی» پاکستان حکومتیدن افغانستانلیک ژورنالیستلر و عاموی اخبارات واسطهلری خادملرینی «هېچ قندهی حالتده» چیقارمسلیگینی سۉرهدی.
تشکیلات تیناوون کېچقورون اعلان قیلگن بیاناتیده، پاکستانده افغانسانلیک قاچقینلرگه، خصوصاً ژورنالیستلر و عاموی اخبارات واسطهلری خادملریگه نسبتاً یوز بېرهدیگن معاملهدن «جوده خواطردهمیز». «نی» پاکستان حکومتیدن افغانستان قاچقینلرینی طالبان اوستیدن باسیم واسطهسی صفتیده ایشلهتمسلیکنی طلب قیلگن.
تشکیلاتنینگ معلوماتیگه کۉره، سۉنگّی۲۴ ساعت ایچیده فقطگینه اسلامآباد نینگ اۉزیده بېش نفر افغانستان ژورنالیستی و عاموی اخبارات واسطهسی خادمی حبسگه آلینگن و اولر افغانستانگه قیتریلیشی اوچون مخصوص سقلاو مرکزیگه یوباریلگن.
«نی» نینگ قۉشیمچه قیلیشیچه، ژورنالیستلر، عاموی اخبارات واسطهلری خادملری و افغانستاننینگ باشقه مدنی جماعهچیلیک اعضالری مملکتگه قیتریلگنده اۉلیم خوفی بیلن یوزمه-یوز قالهدیلر. اولرنینگ حیاتینی حمایه قیلیش اولر پناه تاپگن دولتلرنینگ مجبوريتلری قطاریگه کیرهدی.
تشکیلات پاکستان حکومتینی ژورنالیستلر و عاموی اخبارات واسطهلری خادملرینینگ اوشبو مملکتده اوزاق مدت قالیشلری اوچون ضرور شرایط یرهتیشگه چقیرهدی، شونده اولر اۉلیم تهدیدیدن حمایهلنگن بۉلهدیلر.
سورگوندهگی «نی» شونینگدېک عادي یشاووچی و افغانستان مهاجرلریدن طالبان بیلن مذاکرهده باسیم واسطهسی صفتیده فایدهلنیش دیني و اسلامي معیارلرگه قرشی اېکنینی تأکیدلهدی.
افغانستانده حاکمیتنی قۉلگه آلگن طالبان ژورنالیستلر و مدنی جماعهچیلیک فعاللری دشمن حسابلنهدی و بو یۉنلیشده فعالیت یوریتگن شخصلر اولر نظریده واجبالقتل دېب قرهلهدی.» دېیلگن مذکور بیاناتده.
پاکستان حکومتی سۉنگّی پیتلرده مهاجرلرنی حبسگه آلیش و اولرنی افغانستانگه قیتریشنی کېسکین کوچهیتیرگن.
پاکستاندهگی افغانستانلیک مهاجرلرنینگ معلوم بیر قِسمی طالبان تهدیدی طفیلی افغانستاندن قاچیشگه مجبور بۉلگنلر. اولر آرهسیده ژورنالیستلر، سابق حکومت خادملری، مدنی جماعهچیلیک فعاللری و انسان حقوقلری حمایهچیلری بار.
