طالباننینگ مالیه وزیرلیگی پاکستان بیلن تجاری علاقهلرینینگ اوزیلیشی مملکت تجارتی جریانیگه سلبي تأثیر کۉرستمهگنینی بیلدیرگن.
وزیرلیک بوگون( یکشنبه ۲ قوس) افغانستاننینگ قۉشنی دولتلر، منطقه و جهان بیلن تجارتی هنوز عادتدهگیدېک و هېچ قندهی معماسیز دوام اېتماقده دېب معلوم قیلگن بیر اعلامیهده.
طالبان مالیه وزیرلیگینینگ معلوم قیلیشیچه، پاکستان بیلن تجاری مناسبت تۉختهتیلگنیدن سۉنگ هم باجخانه توشوملریده هېچ قندهی کمهییش رۉی بېرمهگن و تجارت یوکلری مملکت باجخانهلریده عادتدهگی ترتیبده رسميلشتیریلماقده.
وزیرلیکنینگ ادعا قیلیشیچه، مملکتدهگی برچه باجخانهلرده ایچکی و تشقی تجارلر اوچون مهم قولهیلیکلر یرهتیلگن، شونده اولر پاکستان اۉرنیگه باشقه قۉشنی مملکتلر، منطقه و دنیا دولتلری بیلن سودا قیلیشلری ممکن بۉلهدی.
طالبان پاکستان بیلن یوزهگه کېلگن سیاسي ضدیتلر و تۉقنهشوولردن سۉنگ، مملکت تجارکارلریدن واردات و صادرات اوچون مقابل یۉللرنی تنلشنی سۉرهگن اېدی.
شونینگدېک، بو گروه پاکستاندن دارو-درمان صادر قیلووچی شرکتلرگه اوچ آی مدت بېرگن بۉلیب، اوشبو مدت یکونلنگچ، پاکستاندن دارو آلیب کیریش تۉلیق منع قیلینهدی.
افغانستان و پاکستان اۉرتهسیدهگی چېگره اۉتیش نقطهلری بیر آیدن آرتیق وقت دوامیده یاپیق بۉلیب، ایکّی دولت اۉرتهسیدهگی تجارت تۉختهگن.
بونگچه ننگرهر سرمایه یاتقیزیش و تجارت اتاغی رهبری گُلمرداد عرب، فقط ترخم چېگره بېکتینینگ یاپیلیشی سببلی افغانستان تجارلری کونیگه قریب ایکّی یریم میلیون دالر ضرر کۉرهدیلر دېگن اېدی.
بعضی یشاوچیلر اېسه افغانستان و پاکستان اۉرتهسیدهگی تجارت تاۉختهگندن سۉنگ، مملکت بازارلریده اَیریم محصولاتلرنینگ نرخی آشگنینی ایتماقدهلر.
