طالبان نینگ مالیه وزیرلیگی، جهان بانکی افغانستاندهگی قراردادی شرکتلردن بۉلگن قرضلرینی تۉلش جریانینی باشلهگنینی بیلدیردی.
وزیرلیک بوگون (شنبه،۱ قوس) ترقتگن بیاناتیده، حاضرده جهان بانکی اسلامي امیرلیگی (طالبان) قَیته حاکمیتگه کېلیشیدن آلدین حجتلری تۉلیق رسميلشتیریلگن و کۉریب چیقیلگن لایحه و قراردادی شرکتلرگه تۉلاولرنی عملگه آشیریشگه تیار اېکنینی معلوم قیلدی.
مالیه وزیرلیگینینگ قۉشیمچه قیلیشیچه، حاضر جهان بانکی و وزیرلیکنینگ نظارت گروهی تامانیدن حجتلری تېکشیریلگن و تصدیقلنگن شرکتلرگه تۉلاولر باشلنگن.
وزیرلیک معلوماتیگه کۉره، تېکشیروولر نتیجهسیده جهان بانکینینگ افغانستاندهگی قراردادی شرکتلرگه قریب 45 میلیون دالر قرضدار اېکنی انیقلنگن بۉلیب، بو مبلغ تۉرت باسقیچده اوشبو وزیرلیک بیلن همکارلیکده تۉلب بېریلهدی.
بیاناتده ایتیلیشیچه، بیرینچی باسقیچده۹.۳میلیون دالر تۉغریدن-تۉغری تشقی قراردادچیلرگه جهان بانکی تامانیدن تۉلهنهدی.
ایکّینچی باسقیچده، حاضر باشلنگن بۉلیب،۱۶.۸ میلیون دالر مالیه وزیرلیگی آرقهلی شرکتلرگه بېریلهدی.
وزیرلیکنینگ ایتیشیچه، اوچینچی و تۉرتینچی باسقیچلرده هم قالگن تۉلاولر نوبت بیلن عملگه آشیریلهدی.
مالیه وزیرلیگی جهان بانکینینگ بو قرضلرنی تۉلهشی «ایجابي قدم» اېکنینی بیلدیرگن.
اما جهان بانکی حاضرچه بو بارهده ایضاح بېرمهگن. شو بیلن بیرگه، ایلگریگی بیاناتلریده او افغانستان قراردادچیلریدن قرضدارلیگینی رد اېتگن اېدی.
جهان بانکی نینگ اوّلگی بیاناتیده تأکیدلنیشیچه: «بو شرطنامهلر افغانستان جمهوریتی حکومتی و قراردادی اۉرتهسیده توزیلگن؛ شو باعث، اوشبو قرضلرنی تۉلش مسوولیتی جمهوریت حکومتیگه تېگیشلی، جهان بانکیگه اېمس.»
بانک نینگ معلوم قیلیشیچه، قراردادیلر ۲۰۲۱- ییل ۱۵ – اگستدن اوّل جهان بانکی مالیهلشتیرگن لایحهلردهگی ایشلرنی بجرگن، بیراق اۉز پوللرینی آلالمهگن. بانک اۉزی بو شرطنامهلرنینگ تامانی اېمسلیگینی، فقط مستقل اوچینچی تامان تامانیدن آلیب باریلگن پُخته تېکشیروودن سۉنگ، تۉلاو جریانینی «فوقالعاده و کۉپ باسقیچلی» میکانیزم آرقهلی یېنگیللشتیریب بېرهیاتگنینی بیلدیرگن.
شونینگدېک، جهان بانکی مالیه وزیرلیگی نینگ «آلدینگی لایحهلر قَیته باشلنگن» دېگن ادعاسینی هم رد اېتگن.
طالبان قَیته حاکمیتگه کېلگنیدن کېین هم جهان بانکی افغانستانگه یاردم بېریشده دوام اېتگن، بیراق دایما تأکیدلب کېلگن:
یاردملر طالبان نظارتیدهگی تیزیملردن تشقریده، بیرلشگن ملتلر تشکیلاتی و خلق ارا تشکیلاتلر آرقهلی عملگه آشیریلهدی.
