منبعلرنینگ ایتیشیچه، اۉتگن هفته دایمیرداد، میدان وردهکده کوچمنچیلر هجومی عاقبتیده اۉلدیریلگن ییگیتنینگ کیچیک اوکهسی روحي ضربه طفیلی وفات اېتگن.
منبعلرگه کۉره، ۱۴ یاشلی نورلله «یورهگی یاریلگن» بۉلگن. ایتیلیشیچه، او اکهسی نورۉزنینگ اۉلدیریلیشی و باشقه اکهسی رحمتنینگ یرهلنیشیدن سۉنگ آلتی کون دوامیده ییغلب یورگن و پنجشنبه کونی کېچهسی (۲۹ عقرب) وفات اېتگن.
گرچه بالهنینگ اۉلیمی نینگ انیق سببی معلوم بۉلمهسه-ده، منبعلر، او اکهسی نینگ اۉلدیریلیشیدن کېین کۉپ قان قوسگن دېب ایتهدیلر.
نورولله نینگ اکهسی نوروز بیر هفته اوّل (شنبه ۲۳ عقرب) اۉز اویی یقینیده، قوطو قیشلاغیده صادر بۉلگن قوراللی هجومده اۉلدیریلگن. بو هجومده باشقه اکهسی رحمت آغیر یرهلنیب، بیر هفتهدن بویان کوما حالتیده. منبعلرنینگ ایتیشیچه، داکترلر رحمتنینگ احوالینی هم آغیر دېب ایتگن. او حاضر کابلدهگی ایمرجنسی شفاخانهسیده یاتیبدی.
منبعلر هجوم قوراللنگن کوچیلر تامانیدن صادر اېتیلگنینی ایتیشماقده.
ایتیلیشیچه، نوروز و اونینگ عایلهسی قوطو قیشلاغیده یشهیدیگن یگانه عایله بۉلیب قالگن، کوچیلر اېسه اولرنی قیشلاقدن کۉچیریشگه اورینیب کېلیشگن.
منبعلرگه کۉره، ایلگری قوطو منطقهسیده، ایکّی قیشلاقنی اۉز ایچیگه آلگن حالده،۲۰۰ عایله یشهگن، اما کوچیلرنینگ تکراري هجوملری سبب کۉچیب کېتیشگه مجبور بۉلیشگن.
ایتیلیشیچه، نوروز و اونینگ عایلهسی سۉنگّی ایکّی ییل ایچیده قوطو قیشلاغیگه قَیتیب کېلیب، دهقانچیلیک و چارواچیلیک بیلن شغللنیب یورگن.
