پاکستان پولیسی کابلدن کېلگن بیر گروه یۉلاوچینی اسلامآباد قۉنالغهسیده تۉختهتیب قالگن و اولرنی افغانستانگه قَیتریشی ایتیلماقده.
اطلاعات روز گزیتهسیگه گپیرگن یۉلاوچیلردن بیرینینگ ایتیشیچه، اولر ۳۰ کیشی بۉلیب، بوگون (پنجشنبه، ۲۹ عقرب) توشدن آلدین کابلدن اسلام آبادگه اوچیب کېلگنلر.
اونینگ سۉزلریگه کۉره، برچه یۉلاوچیلر ویزهگه، حقیقي پاسپورتگه همده باریب-کېلیش تکتیگه اېگه بۉلیشیگه قرهمهی، پاکستان پولیسی اولرنی «هېچ قندهی سبب کۉرسهتمسدن» تۉختهتیب قالگن.
منبعنینگ ایتیشیچه، یۉلاوچیلرنینگ اَیریملری پاکستانگه دوالنیش اوچون کېلیشگن و اولر آرهسیده عیاللر و بالهلر هم بار. اونینگ قۉشیمچه قیلیشیچه، بو یۉلاوچیلر توشدن کېین ساعت۱:۰۰دن بېری اسلام آباد قۉنالغهسیده قالیب کېتگن، او یېرده «نه طعام بار، نه ایچیملیک سوو».
منبعگه کۉره، پاکستان پولیسی یۉلاوچیلرنینگ پاسپورتیگه قَیتریش مُهرینی باسگن و اولرنی اېرتهگه افغانستانگه جۉنهتیشینی ایتگن.
ینه بیر منبعنینگ ایتیشیچه، پاکستان پولیسی اَیریم افغان یۉلاوچیلردن پول آلیب، اولرگه اسلامآبادگه کیریشگه رخصت بېرگن.
منبعلر سۉزلریگه کۉره، سۉنگّی کونلرده هم پاکستان پولیسی افغانستان یشاوچیلرینی آرتگه قَیترگن.
پاکستان حاضر طالبان بیلن کېسکینلیک کوچهیگن بیر پیتده، افغانستان مهاجرلرینی حبسگه آلیش و چیقریب یوباریشنی هم کوچهیتیرگن.
