فاریابدهگی منبعلرنینگ خبر بېریشیچه، جاري هفته دوامیده اوشبو ولایتنینگ کمیده ایکّی نفر یاش ییگیتی ایران چېگرهلریدن اۉتیب یېتیشگه حرکت قیلهیاتگنده وفات اېتگن.
اوشبو یاشلرنینگ بیری ظفربېک، قاچاق قیلووچیلر موترینینگ آرقه قِسمیده نفس یېتیشماوچیلیگی نتیجهسیده وفات اېتگن. ایکّینچیسی، تاج محمد، اۉغریلر تامانیدن اۉلدیریلگن.
منبعلر ظفربېک پشتونکوت اولسواللیگینینگ«جمشیدی» قیشلاغیدن بۉلگنینی ایتهدی. او ایکّی کون آلدین (سهشنبه، ۲۷ عقرب) ایران حدودیده قاچاق قیلووچیلر موترینینگ آرقه قِسمیده نفس یېتیشماوچیلیگی سبب وفات اېتگن.
فاریاب بیلیم یورتی استادی و ظفربېکنینگ ایناغهسی خال محمد شجاعنینگ فیسبوک صحیفهسیده، اوکهسی نان تاپیش مقصدیده ایران یۉلینی تنلهگنینی یازگن.
منبعلرگه کۉره، تاج محمد فاریاب ولایتی خواجه سبزپوش اولسواللیگی «پخلتاغک» قیشلاغی نینگ یشاوچیسی بۉلگن. منبعلرنینگ ایتیشیچه، او جمعه کونی (۲۳ عقرب) ایران چېگرهسیده اۉغریلر تامانیدن اۉلدیریلگن.
تاجمحمدنینگ یقینلریدن بیری گُلبدالدین، او قرضدارلیگی و ایشسیزلیگی سبب ایرانگه باریشنی نیت قیلگنینی، اما یۉل دوامیده ایران حدودیده اۉغریلر قۉلگه آلگنینی و تشیش وقتیده اۉغریلر موتری اغدریلیب، تاجمحمد وفات اېتگنینی ایتگن.
فاریاب منبعلرینینگ سۉزلریگه کۉره، سۉنگّی پیتلرده ولایتدن کۉپلب یاشلر ایش تاپیش مقصدیده ایرانگه قاچاق یۉلی بیلن کۉچیب اۉتیشگه اورینماقده. بو یۉل جوده خوفلی و اۉلیملی بۉلیب، اَیریم ایش قیدیرووچیلر منزلگه یېتیب بارمهی وفات اېتماقده.
سهشنبه کونی ایران یېتکرمهلرینینگ خبر بېریشیچه، سیستان و بلوچستان ولایتیده «رخصتسیز یشاوچی»نی تشووچی موتر تۉقشنگنی عاقبتیده تۉقّیز کیشی وفات اېتگن و یېتّی کیشی جراحتلنگن.
حاضرده ایران افغانستان یشاوچیلریگه ویزه بېریشنی چېکلهگن و شو بیلن بیرگه، مهاجرلرنی دیپورت قیلینماقده. ویزهگه کیره آلمهسلیک اېسه بعضیلرنی قاچاق یۉلی بیلن حرکت قیلیشگه مجبور قیلماقده.
