بیرلشگن ملتلر تشکیلاتیگه قرهشلی ادارهلر افغانستانده قیزهمیققه قرشی عمومی اېملش کمپاینینینگ ایکّینچی باسقیچی یکونلنگنینی معلوم قیلیب، بو باسقیچده سکّیز میلیوندن آرتیق باله اېملنگنینی بیلدیردی.
مذکور کمپاین جهان ساغلیقنی سقلش تشکیلاتی (دبلیوایچاو)، بیرلشگن ملتلر تشکیلاتینینگ بالهلر جمغرمهسی (یونیسف) و (Gavi)واکسین بیرلشمهسی تامانیدن عملگه آشیریلگن.
۱۹-اکتوبردن باشلنگن بو اېملش جریانیده ۱۷ ولایتده ۶ آیلیکدن ۱۰ یاشگچه بۉلگن۸ میلیون۳۵۵ مینگدن آرتیق باله قیزهمیق واکسینینینگ بیر دوزی بیلن اېملندی.
شونینگدېک، جَنوبي و جَنوب-شرقي بېش ولایتده ۳میلیون۹۵۳ مینگدن آرتیق باله آغیز آرقهلی بېریلهدیگن پولیو (بالهلر فلجی) واکسینینینگ بیر دوزی بیلن هم تأمینلندی.
جهان ساغلیقنی سقلش تشکیلاتی نمایندهسی دکتر ادوین سنیزا سالوادور، «ایکّینچی ییریک عمومی اېملش کمپاینینینگ عملگه آشیریلیشی ینه تۉقّیز میلیون افغان بالهسینی حمایه قیلیش اوچون جهان ساغلیقنی سقلش تشکیلاتی، افغانستان ساغلیقنی سقلش ساحهسی مسووللری، همکارلر و جماعهلرنینگ قطعي مجبوريتینی کۉرسهتهدی» دېدی.
یونیسفنینگ افغانستاندهگی نمایندهسی دکتر تاجالدین اویواله، «ایکّینچی باسقیچنینگ یکونلنیشی افغانستان بالهلرینی بو کسللیکدن حمایه قیلیش یۉلیده مهم ینه بیر قدمدیر. قیزهمیق هېچ قچان بیرار بالهنینگ حیاتی عوضیگه توشمسلیگی کېرهک.»
بیرلشگن ملتلر تشکیلاتی ادارهلرینینگ قۉشیمچه قیلیشیچه، قیزهمیققه قرشی عمومی اېملش کمپاینینینگ ایکّی باسقیچی هم موفقیتلی یکونلنگچ، حاضرگه کېلیب۱۶.۶میلیوندن آرتیق باله اوشبو خوفلی، اما آلدینی آلیش ممکن بۉلگن کسللیکدن حمایهلنگن.
