ایران تشقی ایشلر وزیری عباس عراقچی تورکيه تشقی ایشلر وزیری هاکان فیدان بیلن تیلفون آرقهلی صحبتده طالبان و پاکستان اۉرتهسیدهگی کېسکینلیکنی کمهیتیریش اوچون مصلحتلرنی کېنگهیتیریش ضرورلیگینی تأکیدلهگن.
تورکيه و قطر طالبان و پاکستان اۉرتهسیدهگی استانبول و دوحه مذاکرهلرینینگ واسطهچیلری اېدی، بیراق بو مذاکرهلر نتیجه بېرمهدی.
عراقچی فیدانگه قیلگن صحبتیده «پاکستان و افغانستان اۉرتهسیدهگی کېسکینلیکنی کمهیتیریش یۉلیده کۉریلگن سعی-حرکتلرنی قدرلشینی و منطقوي تینچلیک همده برقرارلیکنی سقلش اوچون مصلحتلرنی کېنگهیتیریش مهملیگینی» ایتگن. شونینگدېک، ایراننینگ بو بارهده یاردم بېریشگه تیارلیگینی بیلدیرگن.
ایران تشقی ایشلر وزیری بوندن ایلگری هم پاکستان و طالبان تشقی ایشلر وزیرلری بیلن تیلفون آرقهلی صحبت قیلیب، مذاکرهلرنی دوام اېتتیریش ضرورلیگینی تأکیدلهگن اېدی.
ایران تشقی ایشلر وزیرلیگی مطبوعات کاتبی اسماعیل بقایینینگ ایتیشیچه، اگر طالبان و پاکستان راضی بۉلسه، ایران ایکّی مملکت اۉرتهسیدهگی کېسکینلیکنی کمهیتیریش اوچون واسطهچیلیک قیلیشگه تیار.
حاضرگچه قطر و تورکيه واسطهچیلیگیده طالبان و پاکستان اۉرتهسیده دوحه و استانبولده اوچ بار مذاکره اۉتکزیلدی. آخرگی باسقیچ اۉتگن جمعه یکوني کېلیشووسیز توگهدی. کابل و اسلام آباد اېسه مذاکرهلرنینگ نتیجه بېرمسیده بیر-بیرینی عیبلهماقده.
مذاکرهلر موفقیتسیز یکونلنگچ، پاکستان مدافعه وزیری حاضرچه مذاکرهلرنی دوام اېتتیریش رېجهسی یۉقلیگینی اعلان قیلدی.
