ایران تشقی ایشلر وزیری عباس عراقچی و قطر باش وزیری همده تشقی ایشلر وزیری شیخ محمد بن عبدالرحمان آلثانی تیلفون آرقهلی گپیریب، طالبلر و پاکستان اۉرتهسیدهگی ترنگلیکدن خواطر بیلدیرگن.
ایران تشقی ایشلر وزیرلیگی بوگون (پنجشنبه، ۲۲عقرب) اعلان قیلگن بیاناتگه کۉره، تیلفون صحبتیده تامانلر بو ترنگلیککه اعتبار قرهتیب، «منطقهدهگی تینچلیک و برقرارلیکنی سقلش اوچون منطقه دولتلرینینگ دواملی یخشی سعی-حرکتلری مهملیگینی» تأکیدلهگن.
ایران تشقی ایشلر وزیری شونینگدېک، تیناوون روسيه تشقی ایشلر وزیری سرگئی لاوروف بیلن طالبان و پاکستان اۉرتهسیدهگی ترنگلیک مسألهسیده صحبتلشگن و ایکّی تامان اۉرتهسیدهگی سۉنگگی ماجرا حقیده خواطر بیلدیرگن.
تخمیناً بیر آی آلدین طالبلر و پاکستان چېگرهوي مسألهلر یوزهسیدن ماجرا قیلگن؛ بو تۉقنشوو بیر هفته دوام اېتیب، اۉت آچمسلیک شرطلری بیلن یکونلنگن.
شوندن سۉنگ، تامانلر قطر و تورکيه واسطهچیلیگیده دوحهده و استانبولده اوچ مرته مذاکره آلیب بارگن، اما بو صحبتلر اۉتگن جمعه کونی یکوني کېلیشووسیز توگهگن.
حاضرگی وقتده تامانلر قرهمه-قرشی تامان تینچلیکنی بوزمهگونچه اۉت آچمسلیک شرطلریگه رعایه قیلیشلرینی بیلدیرگن، اما آغزهکی ترنگلیک دوام اېتماقده و ایکّی دولت اۉرتهسیدهگی چېگره اۉتیش یۉللری هنوز یاپیق.
