اسلامی همکارلیکلر تشکیلاتی اۉرین باسری همده تشکیلاتنینگ افغانستان بۉییچه مخصوص نمایندهسی طارق علیبخیت طالبان تشقی ایشلر وزیری امیرخان متقي بیلن اوچرهشووده بو گروه بیلن پاکستان اۉرتهسیدهگی معمالرنی ملاقات آرقهلی حل قیلیشنی سۉرهدی.
طالبان تشقی ایشلر وزیرلیگی خبریگه کۉره، جناب بخیت بوگون (پنجشنبه، ۲۲ عقرب) کابلگه سفری جریاینده امیرخان متقي بیلن اوچرهشگن و صحبتلشگن.
وزیرلیکنینگ بیاناتیده ایتیلیشیچه، اسلامی همکارلیک تشکیلاتی اۉرینباسری اوچرهشووده طالبان و پاکستان اۉرتهسیدهگی تینچلیک و اۉت آچمسلیکنی مقتهگن.
بیاناتگه کۉره، امیرخان متقي اوچرهشووده طالبان و پاکستان اۉرتهسیدهگی آخرگی ماجرا و مذاکرهلر بۉییچه باتفصیل معلومات بېرگن و طالباننینگ ملاقات آرقهلی نزاعلرنی حل قیلیشگه ایشانچی بارلیگینی تأکیدلهگن.
طالبان و پاکستان بیر هفتهلیک ماجرا آرتیدن قطر و تورکيه واسطهچیلیگیده اوچ مرته مذاکره اۉتکزگن، لېکن بو صحبتلر اۉتگن جمعه کونیگه قدَر یکوني کېلیشووسیز توگهگن.
حاضرگی وقتده تامانلر اۉز ارا تینچلیک شرطلرینی قرهمه-قرشی تامان بوزمهگونچه سقلشگه کېلیشیب آلگن، اما آغزهکی تهدیدلر و ترنگلیکلر دوام اېتماقده، ایکّی دولت اۉرتهسیدهگی چېگرهوي اۉتیش یۉللر اېسه یاپیق.
شونینگدېک، طالبان تیناوون افغانستان نینگ تجارت و صناعتکارلریگه وارد وصادرات اوچون پاکستاندن مقابل یۉللرنی تنلشنی توصیه قیلگن و اوچ آی ایچیده پاکستاندن دارو آلیب کېلینیشی منع قیلینیشینی اعلان قیلگن.
