خلقارا عفو تشکیلاتی طالباننینگ هرات ولایتیدهگی عیاللر اوستیدن جاري اېتگن ینگی چېکلاولریگه مناسبت بیلدیریب، بو گروه عیاللر و قیزلرنینگ حیاتینی «چیدهب بۉلمس» درجهگه یېتکزگنینی ایتدی.
تشکیلات بوگون (پنجشنبه، ۲۲ عقرب) اجتماعي ترماق ایکس صحیفهسیده یازیشیچه، طالبان عیاللرنی دېیرلی برچه حیات ساحهلریدن سیقیب چیقرگن و اولرنینگ حقوق همده قدر- قیمتینی تیزیملی بیر روشده پایمال قیلماقده.
سۉنگگی کونلرده طالبان هراتده عیاللرگه بورقع کيیشنی مجبوري اېتیب بېلگیلهگن و بورقعسیز عیاللرنینگ دولت ادارهلری همده شفاخانهلرگه کیریشیگه تۉسقینلیک قیلگن.
خلق ارا عفو تشکیلاتی بو چېکلاولر عیاللرنینگ ضرور طبي خدمتلرگه اېریشیش امکانیتینی جدّي درجهده چېکلب قۉییشینی تأکیدلهدی.
تشکیلات خلق ارا همجمعیتنی افغانستاننینگ جسور عیال و قیزلرینی قۉللب-قوّتلشگه، همده طالباننی جوابگرلیککه تارتیش آرقهلی اولرگه همدردلیک بیلدیریشگه چقیردی.
طالبان 2021-ییلده حاکمیتنی قَیته اېگهلهگنیدن بېری عیاللرنینگ جماعت حیاتیدهگی اشتراکی و کيینیش اېرکینلیگی اوستیدن کېنگ کۉلملی چېکلاولر جاري اېتگن.
طالباننینگ «امر به معروف و نهی ار منکر» قانونیده عیاللرنینگ بوتون بدنی یاپیق بۉلیشی شرط دېب بېلگیلنگن، شونینگدېک، عیال نینگ آوازی «عورت» (اېشیتیلیشی گناه) دېب اعلان قیلینگن و اویدن تشقریده آوازینی اېشیتتیریش منع اېتیلگن.
