بوگون پاکستان پایتختی اسلام آبادده یوز بېرگن پارتلش آرتیدن مملکت مدافعه وزیری خواجه محمد آصف «بیز اوروش حالتیده یشهیهپمیز و بوندهی وضعیتده کابل حکمدارلری بیلن موفقیتلی مذاکرهلرگه امید باغلش بېهوده» دېدی.
پاکستان مدافعه وزیری سهشنبه کونی (۲۰ عقرب) ایکس اجتماعی ترماغیده یازگنیده شوندهی تأکیدلهدی: «کابلدهگی حکمدارلر پاکستاندهگی تروریزمنی تۉختهته آلهدیلر، اما بو جنگنی اسلام آبادگچه آلیب کېلیش بو کابلدن کېلگن خبر بۉلیب، پاکستان بونگه تۉلیق جواب بېریش قدرتیگه اېگه.»
اونینگ قۉشیمچه قیلیشیچه، «کیمدیر پاکستان اوردوسی فقط افغانستان-پاکستان چېگره حدودلریده یاکه اوزاق بلوچستان اولسواللیکلریده جنگ قیلماقده، دېب اۉیلهسه بوگونگی اسلام آباددهگی اۉز جانیگه قصد هجومی آگاهلنتیریش قۉنغیراغی دیر. بو اوروش بوتون پاکستان نینگ اوروشی دیر.»
خواجهنینگ آصف ایتیشیچه، پاکستان اوردوسی هر کونی بو جنگده قربانلر بېرهدی و خلقیگه خوفسیزلیک حسینی تأمینلهیدی.
بوگون توش چاغلریده اسلام آباددهگی محکمه بناسی تشقریسیده صادر بۉلگن پارتلشده 12 کیشی اۉلدی، 27 کیشی اېسه یرهلندی.
افغانستاندهگی طالبان تشقی ایشلر وزیرلیگی اعلان قیلگن بیاناتده بو هجومنی کېسکین قارهلهدی.
حاضرچه هېچ بیر گروه پارتلش اوچون جوابگرلیکنی اۉز ذمّهسیگه آلمهگن، بیراق پاکستان یېتکرمهلری بو هجومنی «خوارج فتنهسی» دېب اتهدی، بو اتَمه پاکستانده «پاکستان طالبان حرکتی» (تیتیپی)گه نسبتاً ایشلهتیلهدی.
بو هجوم قطر و تورکيه واسطهچیلیگیده اۉتگن، اما نتیجهسیز یکونلنگن طالبان و پاکستان اۉرتهسیدهگی اوچ باسقیچلی مذاکرهلردن سۉنگ اېنگ هلاکتلی هجوم حسابلنهدی.
