ایران تشقی ایشلر وزیرلیگی سۉزلاوچیسی اسماعیل بقایی، طالبان و پاکستان راضیلیک بیلدیرسهلر، ایران ایکّی مملکت اۉرتهسیدهگی ترنگلیکلرنی کمهیتیریش بۉییچه واسطهچیلیک قیلیشگه تیارلیگینی معلوم قیلدی.
او بوگون (دوشنبه، ۱۹ عقرب) مطبوعات ییغینیده، ایران تشقی ایشلر وزیری عباس عراقچی طالبان و پاکستان تشقی ایشلر وزیرلری بیلن علیحده صحبتلریده «معمانی حل قیلیش و ترنگلیکنینگ کوچهییشینینگ آلدینی آلیش بۉییچه هر قندهی یاردمگه تیار» اېکنلیگینی بیلدیریبدی.
بقایی، «بیز شرقي چېگرهلریمیزدهگی هر قندهی ترنگلیکنینگ آرتیشیدن جوده خواطردهمیز؛ نهفقط قۉشنیچیلیک سببلی، بلکه پاکستان و افغانستان ایکّیته مسلمان مملکت بۉلیب، اران بیلن چوقور تاریخي، مدني و دینی علاقهلرگه اېگه.» دېب قۉشیمچه قیلدی.
اونینگ تاکیدلهشیچه، ایران شرقي چېگرهلریدهگی هر قندهی خوفسیزلیک بوزیلیشی بوتون منطقه خوفسیزلیگیگه تأثیر قیلیشی ممکن.
ایران تشقی ایشلر وزیرلیگی سۉزلاوچیسی معلوماتیگه کۉره، تهران نزاعلر یوزهگه کېلگنیدن باشلب تامانلرنی صبر-طاقتلی بۉلیشگه چقیرگن و ایکّی دولت اۉرتهسیدهگی ترنگلیکنی برطرف اېتیش اوچون واسطهچیلیک قیلیشگه تیارلیگینی بیلدیرگن.
آخرگی آیلر دوامیده طالبان و پاکستان اۉرتهسیدهگی ترنگلیک کوچهیگن و مذاکرهلر اۉتکزیش بۉییچه سعی-حرکتلر حاضرگچه نتیجه بېرمهگن. ایکّله تامان اۉرتهسیده قطر و تورکيه واسطهچیلیکده دوحه و استانبولده اوچ مرته مذاکره بۉلیب اۉتگن، اما آخرگی باسقیچ جمعه کونی استانبولده یکونلنگن و یکوني کېلیشووگه اېریشیلمهگن.
