طالباننینگ بادغیس ولایتیدهگی امنیه قوماندانلیگی بالامرغاب اولسواللیگیده اوروشدن قالگن قۉشه بمبنینگ پارتلشی عاقبتیده ایکّی باله هلاک بۉلگنیدن خبر بېرگن.
طالباننینگ ولایت امنیه قوماندانلیگی سۉزلاوچیسی صدیقالله صدیقینینگ معلوم قیلیشیچه، بو بالهلر بالامرغاب اولسواللیگینینگ پنیرک ساحهسیده چاروا باقهیاتگن پیتده یېرده یاتگن پارتلهمهگن بمبهنی تاپگن و اونی اۉتگه تشلشگن؛ نتیجهده پارتلش یوز بېرگن و هر ایکّیسی هلاک بۉلگن.
اونینگ ایتیشیچه، بو حادثه تیناوون (یکشنبه، ۱۸ عقرب) اېرتهلب صادر بۉلگن.
شونگه اۉخشش حادثهلر ایلگری هم بالهلر حیاتیگه ضامن بۉلگن.
افغانستانده اۉنلب ییللر دوام اېتگن اوروشلر نتیجهسیده مملکت حدودینینگ کتّه قِسمی ماینلر و پارتلهمهگن حربي اۉق-داریلر بیلن افلاسلنگن.
طالبان معلوماتلریگه کۉره، مملکتده قریب بیر مینگ ۱۵۰ کیلومتر یېر ماینلر و اوروشدن قالگن پارتلاوچی مادّهلر بیلن افلاسلنگن.
بیرلشگن ملتلر تشکیلاتی اېسه، افغانستانده اوچ میلیون ۳۰۰ مینگدن آرتیق کیشی ماینلر و پارتلاوچی مادّهلر بیلن افلاسلنگن حدودلرنینگ بیر کیلومتر مصافهسیده یشهیدی.
اوروشدن قالگن ماینلر و پارتلاوچی مادّهلر هنوزگچه مملکت یشاوچیلری، اینیقسه بالهلر اوچون، جدّي خوف توغدیرهدی.
