هراتده محلی منبعلر طالبلرنینگ امر به معروف و نهی از منکر ادارهسی خاتین – قیزلر مذکور ولایت فروشگاهلریگه برقعسیز باریشلرینی منع قیلگنینی ایتهدی.
منبعلرنینگ ایتیشیچه، بو حقدهگی بویروق بوگون (چهارشنبه ۱۴ عقرب) هرات شهری فروشگاهلر مسووللری بیلن اۉتکزیلگن ییغینده بیلدیریلگن.
هراتده طالبلرنینگ امربه معروف و نهی از منکر ادارهسی بوندن کېیین خاتین – قیزلر فروشگاهگه کېلگن چاغده برقع یا-ده عربی چادر سالیشگه مجبورلر دېب تاکیدلهگن.
شونینگدیک منبع، طالبلر هرات شهریده عیاللرنی برقعسیز دولت ادارهلریگه باریشینینگ هم آلدینی آلگن دېب ایتگن.
معلوماتلرگه قرهگنده، طالبلرنینگ امربه معروف و نهی از منکر ادارهسی خادملری برقعسیز عیاللرنی معارف، جمعیتنی رویخطگه آلیش، محکمه ریاستلری قۉشیمچه هرات حوزوی شفاخانهسیگه کیرگنی قۉیمهگن.
باشقه تاماندن ایریم خاتینلرنینگ اطلاعات روزگه ایتیشلریچه، بوتونلهی حجابنی مرعات قیلیشگه قرهمهی، برقعلری بۉلمهگنی سبب دولت ادارهلریگه کیریشگه ایزین بېریلمهگن.
مذکور عیاللردن بیری: «ضرور بیر ایش اوچون محکمهگه بارگن اېدیم. مانتو و قرسیم بار اېدی؛ لېکن امربه معروف خادملری چادرسیز کیریشگه رخصت بېریلمهیدی دېب یۉلدن قیردیلردېیه تیلگه آلهگن.»
طالبلر افغانستانده قیته حاکمیتگه کېلگندن بېری عیاللرنینگ اجتماعده بۉلیشیگه نسبتن کېنگ چېکلاولرنی یرهتدی. اوشبو گروه امر به معروف و نهی از منکر قانونیگ موافق بوتون تنهنی یاپیش ضروری دیر وعیالنینگ سېسی اېسه «عورت» حسابلنهدی.
