طالباننینگ احصائیه و معلومات ادارهسی، جاري قویاش ییلیده مملکتده۴.۵۴میلیون متریک تُن بوغدای ییغیب آلینگنینی معلوم قیلدی.
اوشبو اداره بوگون (چهارشنبه ۱۴ عقرب) اعلان قیلگن اۉزینینگ گزارشیده، تۉپلم حاصل نینگ۴.۱۳میلیون متریک تُنی سوغاریلهدیگن (آبی) بوغدای،۴۰۴ مینگ متریک تُن اېسه للمیکار یېرلرده یېتیشتیریلگن بوغدایدن عبارت.
طالباننینگ احصائیه و معلومات ادارهسیگه کۉره، افغانستاننینگ جاري ییلدهگی عمومي بوغدای احتیاجی۶.۸۷میلیون متریک تُننی تشکیل اېتهدی. شو بیلن، حاصل مقداریگه قرهگنده، مملکتده۲.۳۳میلیون متریک تُن بوغدای تنقیصلیگی موجود.
گزارشده ایتیلیشیچه، اېنگ کۉپ سوغاریلهدیگن بوغدای هلمند، قندوز، هرات، قندهار و فراه ولایتلریده، اېنگ کۉپ للمیکار بوغدای اېسه بدخشان، تخار و هرات ولایتلریده یېتیشتیریلگن.
رسمي معلوماتلرگه کۉره، بو ییل۱.۳۳میلیون هکتار یېر سوغاریلهدیگن بوغدای،۵۶۲ مینگ هکتار یېر اېسه للمیکار بوغدای اېکینلریگه اجرهتیلگن.
سوغاریلهدیگن بوغدای میدانی اۉتگن ییلگه نسبتاً۴ فایزگه، للمیکار بوغدای میدانی اېسه۲۴ فایزگه کمهیگنی کۉرستیلهدی.
طالبلر ادارهسی بو پهسهییشنینگ اساسي سببلرینی قورغاقچیلیک، موسمي یامغیرلرنینگ اۉز وقتیده یاغمسلیگی و اۉسیملیک کسللیکلرینینگ ترقهلیشینی سبب قیلیب کۉرستگن.
افغانستان بېش ییلدن بېری کېتمه-کېت کوچلی قورغاقچیلیکدن اذیت چېکماقده، بو حالت نهفقط اېکینچلیک محصولاتلریگه ضرر یېتکزگن، بلکه مملکتنینگ کۉپلب حدودلریده اهالینینگ تازه ایچیملیک سوویگه بۉلگن اېریشیشنی هم کمهیتیرگن.
