طالبان تشقی ایشلر وزیرلیگی پاکستان تشقی ایشلر وزیری محمداسحاقدار نینگ «طالبان تشقی ایشلر وزیری امیرخان متقي بیر کونده اونگه آلتی مرته تیلفون قیلگن» دېگن ادعاسینی «حقیقتدن اوزاق» دېب اتهدی.
وزیرلیک چهارشنبه (۱۴ عقرب) کونی اعلان قیلگن بیاناتیده، «اصلیده، ایکّی تامان اۉرتهسیدهگی بیرینچی تیلفون صحبتی اۉز ارا توشونیش و هماهنگلیک دایرهسیده عملگه آشیریلگن اېدی دېگن.»
طالبان تشقی ایشلر وزیرلیگینینگ قۉشیمچه قیلیشیچه، «اوشبو صحبت دوامیده جناب اسحاقدار وضعیتدن تۉلیق خبردار اېمسلیگینی بیلدیرگن و تۉلیق معلومات آلگچ، ینه باغلنیشینی ایتگن. شو اساسده ایکّینچی صحبت هم بۉلیب اۉتگن.»
وزیرلیک، بو واقعهدن بیر کون اۉتیب، اسحاقدار ینه متقي بیلن باغلنیشگه اورینگن، بیراق تورلی سببلرگه کۉره علاقه اۉرنهتیلمهگن.
آلدینراق، پاکستان باش وزیری اۉرینباسری و تشقی ایشلر وزیری اسحاقدار، امیرخان متقي شو هفتهنینگ دوشنبه کونی اونگه آلتی مرته تېلفون قیلگنینی بیلدیرگن.
پاکستان تشقی ایشلر وزیرینینگ سۉزلریگه کۉره، او بو صحبتلرده فقط بیرته مسألهگه اورغو بېرگن، طالبان افغانستان توپراغینی پاکستانگه قرشی فایدهلنیلیشیگه یۉل قۉیمسلیگی کېرهک.
طالبان تشقی ایشلر وزیرلیگی بو دعوالرنی رد اېتیب، شوندهی بیانات بېردی، «دولتلر اۉرتهسیدهگی مناسبتلر اۉز ارا حرمت و حقیقتگه اساسلنگن همکارلیک اوستیگه قوریلگن؛ شونینگ اوچون بوندهی ناتۉغری بیاناتلر ایکّی مملکت اۉرتهسیدهگی اۉز ارا حرمت و دیپلوماتیک علاقهلر روحیگه ضد حسابلنهدی.»
وزیرلیک، «طالبان هر دایم قۉشنی دولتلر بیلن اۉز ارا حرمت، توشونیش و ایجابي مناسبتلر اساسیده همکارلیک قیلیشگه اینتیلیب کېلگن. امید قیلهمیزکی، پاکستان حکومتی یوقاری مرتبهلی عملدارلری هم فکر بیلدیرهیاتگنده، فاکتلرنی انیق و تۉغری عکس اېتتیریشگه اعتبار بېریشهدی.»
بو قبیل اظهراتلر اېرتهگه تورکيهنینگ استانبول شهریده اۉتهدیگن طالبان و پاکستان اۉرتهسیدهگی ینگی مذاکرهلر آلدیدن ینگرهدی.
ایلگری استانبولدهگی مذاکرهلرده تامانلر اۉت آچیشنی دوام اېتتیریش و ملاقاتنی دوام اېتتیریش بۉییچه کېلیشووگه اېریشگن اېدیلر.
