بیرلشگن ملتلر تشیکلاتینینگ باش کاتبی آنتونیو گوترش بوتون دنیا بۉیلب ژورنالیستلر حقارت، تهدید، جسماني هجوم، قماق، قییناقلر و حتا اۉلیم کبی تاباره آرتیب بارهیاتگن خوفلرگه دوچ کېلهیاتگنینی ایتدی.
آنتونیو گوترش بوگون (یکشنبه ۱۱ عقرب) «ژورنالیستلرگه قرشی جنایتلر اوچون جزاسیزلیککه برهم بېریش خلقارا کونی» مناسبتی بیلن عدالتنی تأمینلشگه چقیردی.
اونینگ سۉزلریگه کۉره، بوتون دنیاده ژورنالیستلرنینگ هر ۱۰ ته اۉلدیریلیش حالتیدن ۹ تهسی تېرگاو قیلینمهی قالماقده.
بیرلشگن ملتلر تشکیلاتینینگ باش کاتبی شونینگدېک، غزهنی ژورنالیستلر اوچون دنیادهگی اېنگ خوفلی جای دېب اتهب، مستقل و خالص تېرگاو اۉتکزیشگه ینه بیر بار تاکیدلهدی.
«جزاسیزلیک نهفقط قربانلر و اولرنینگ عایلهلری اوچون عدالتسیزلیک، بلکه مطبوعات اېرکینلیگیگه هجوم، زۉراورلیککه اوندهش و دیموکراسیگه تهدید دیر» دېب قۉشیمچه قیلدی.
شونینگدیک آنتونیو گوترش: برچه حکومتلر ژورنالیستلرگه قرشی صادر اېتیلگن جنایتلرنی تېرگاو قیلیب، عیبدارلرنی جوابگرلیککه تارتیشلری و ژورنالیستلرنینگ اېرکین ایشلشی اوچون شرایط یرهتیشلری ضرور حقیده علیحده اورغو بېردی.
بیرلشگن ملتلر تشکیلاتینینگ باش کاتبی، عیال ژورنالیستلرگه نسبتاً آنلاین تهدید و حقارتلرنینگ کۉپهییشیگه قرشی کورهشیشگه چقیریب، بوندهی زۉراورلیکلر کۉپینچه جزاسیز قالیشینی و رئال حیاتده هم جدّي ضرر کېلتیریشینی تیلگه آلدی.
اونینگ قۉشیمچه قیلیشیچه: «دیجیتالی فضا خبر تۉپلب، اولرنی یاریتهیاتگنلر اوچون خوفسیز بۉلیشی کېرهک.»
گوترش ینه شوندهی دېدی: «ژورنالیستلر جیم بۉلسه، بیز هم آوازیمیزنی یۉقاتهمیز. کېلینگ، مطبوعات اېرکینلیگینی حمایه قیلیش اوچون بیرلشهیلیک، جوابگرلیکنی طلب قیلهیلیک و حقیقتنی حاکمیت آلدیده ایتهیاتگنلر قۉرقمسدن بو ایشنی دوام اېتتیره آلسینلر.»
بو آرهده، طالباننینگ افغانستانده حاکمیتنی قَیته قۉلگه کیریتیشیدن سۉنگ، مملکتده عامهوي اخبارات واسطهلری و ژورنالیستلرگه باسیم کېسکین کوچهیگن.
طالبان بیر نېچه بار ژورنالیستلرنی حبسگه آلیب، قییناققه سالگن و قماققه تشلهگن، حاضر هم بیر قنچه ژورنالیستلر بو گروهنینگ قماقلریده سقلنماقده.
