بیرلشگن ملتلر تشکیلاتینینگ افغانستاندهگی انسان حقوقلری بۉییچه مخصوص گزارشگلری ریچارد بنت، «خراسان» (داعش) گروهی تامانیدن افغانستاندهگی آزچیلیکلرگه، اینیقسه هزارهلرگه قرشی اویوشتیریلگن هجوملر خلق ارا جنایتلرنینگ برچه بېلگیلریگه اېگه دېب معلوم قیلدی.
بنت بو حقده بوگون (پنجشنبه، ۸ عقرب) بیرلشگن ملتلر تشکیلاتینینگ ییغیلیشیده تقدیم اېتگن ینگی گزارشده بیان قیلگن. گزارشده جاري ییل نینگ دستلبکی آیلریده افغانستاندهگی انسان حقوقلری وضعیتی اۉرگنیلگن.
اونینگ تأکیدلهشیچه، افغانستاندهگی قومی، مذهبی و تیل جماعهلرینینگ شکایتلری همده اولرگه قرشی صادر اېتیلگن هجوملر یېترلیچه حجتلشتیریلمهگن، تحلیل قیلینمهگن و حل اېتیلمهگن. طالبان اېسه بو ناراضیلیکلرگه اعتبارسیزلیکنی دوام اېتتیرماقده.
ریچارد بنتنینگ آگاهلنتیریشیچه، طالبلرنینگ قومی و مذهبی تفاوتلرگه اعتبارسیزلیگی مملکتده کېسکینلیک و بېقرارلیکنینگ آرتیشیگه آلیب کېلیشی ممکن. او طالبلرنی کمسیتووچی سیاستلریدن واز کېچیشگه و برچه ملتلر همده مذهبی جماعهلرنینگ قرار قبول قیلیش جریانیده حقیقي اشتراکینی تأمینلشگه چقیرگن.
گزارشده قید اېتیلیشیچه، کۉپلب مذهبی اېرکینلیکلرنینگ بوزیلیشی حالتلری انیقلنگن. مثلاً، بدخشانده کمیده 50 نفر اسماعیل شیعهلر مجبورن سنّی مذهبیگه اۉتکزیلگن، شیعه عایلهلرگه اېسه فرزندلرینی سنّی مکتبلرگه یوباریش اوچون باسیم اۉتکزیلگن.
بنت شونینگدېک طالبان «امر به معروف و نهی از منکر» وزیرلیگی مذهبی اېرکینلیکلرنی ینه-ده بۉغیاتگنینی، کۉپلب آدملر «مقّدس نرسهلرنی حقارت قیلیش»، «خدابېزارلیک ترغیباتی» یاکه «نصرانيلیک» کبی عیبلر بیلن حبسگه آلینگنینی بیلدیرگن. او، جملهدن، پکتیکا ولایتیده بیر اۉقیتووچینینگ اۉلیم جزاسیگه حکم قیلینیشی و کابل بیلیم یورتیده آلتی محصلنی شونگه اۉخشش عیبلر بیلن حبسگه آلیش حالتلریگه اشاره قیلگن.
بیرلشگن ملتلر تشکیلاتی مخصوص گزارشگلری طالبان رسمیلری تامانیدن ایشلهتیلهیاتگن حقارت آموز سۉز و عبارهلردن خواطر بیلدیرگن. او، مثلاً، «امر به معروف» وزیری محمد خاید حنفی نینگ نطقیده مسلمان بۉلمهگنلرنی «تۉرت آیاقلی حیوانلر»گه قیاسلهگنینی اېسلهتگن.
بنت، شونینگدېک، اجتماعي ترماقلرده قومی نفرت و کمسیتیش کوچهیگنینی قید اېتگن. جملهدن، هزارهلرنینگ تشقی کۉرینیشیگه دایر حقارتلی سۉزلر ایشلهتیلهیاتگنی و ناتۉغری طرزده برچه پشتونلرنی طالبان طرفدارلری دېب بیلیش حالتلری آرتگن.
اونینگ آگاهلنتیریشیچه، بوندهی تیل و خلق-اطوار کېنگ کۉلملی جنایتلرگه زمین یرهتیشی ممکن. بنت برچه افغانستان اهالیسینی نفرت سۉزلری و حقارتلی نطقلردن تيیلیشگه، انسان قدر-قیمتی همده برچه ملت و مذهبنینگ تېنگ حقوقلریگه حرمت بیلن مناسبتده بۉلیشگه چقیرگن.
