ایران جمهور رییسی مسعود پزشکيان پاکستان ایچکی ایشلر وزیری محسن نقوي بیلن اوچرهشووده تهراننینگ پاکستان و افغانستاندهگی طالبان اۉرتهسیدهگی ضدیتلرنی حل اېتیشده همکارلیککه تیار اېکنینی بیلدیرگن.
ایرنا خبرگزارلیگی پزشکيان «بیز ایشانهمیزکی، کېسکینلیکنی کمهیتیریش و هر قندهی تۉقنهشوودن سقلنیش اوچون حرکت قیلیش لازم. بو پیغمبریمیز (ص) نینگ انیق کۉرسهتمهسی دیر. بوگون مسلمان مملکتلر هر قچانگیدن هم کۉپراق بیرلیک و ایناغهلیکنی سقلب، عمومي دشمنلرگه قرشی بیرگهلیکده توریشی ضرور» دېب تیلگه آلگن.
پاکستان ایچکی ایشلر وزیری نقوي اېسه «حاضرده بیز طالبان بیلن توزهتوچن مذاکرهلر آلیب بارهپمیز. اسلام آباد نزاعلرنی تینچ یۉل بیلن، ملاقات آرقهلی حل قیلیش طرفداری» دېگن.
شونینگدېک او، ایراننینگ منطقهدهگی، اینیقسه اسلام آباد و کابل اۉرتهسیدهگی کېسکینلیکنی کمهیتیریشدهگی فعال رۉلینی آلقیشلهگن و بو یۉنهلیشده یقین همکارلیکنی دوام اېتتیریش مهملیگینی تأکیدلهگن.
معلومکی، طالبان و پاکستان اۉرتهسیدهگی مذاکرهلرنینگ ینگی باسقیچی شو هفته باشیده تورکيهنینگ استانبول شهریده باشلنگن، بیراق مذاکرهلر هېچ قندهی نتیجهسیز یکونلنگن.
پاکستان یېتکرمهلری منبعلرگه تیهنگن حالده، طالبان پاکستاننینگ تروریزمگه قرشی طلبلرینی تۉلیق بجریشگه تیار اېمسلیگینی بیلدیرگن.
ایشانچلی منبعلرنینگ معلوم قیلیشیچه، پاکستان اۉز پیشنهادلریگه قطعي تورگن، اما طالبان هیاتی کابلنینگ کۉرستمهلریگه تۉلیق بۉیسونگن، بو اېسه کېلیشماوچیلیکلرگه سبب بۉلگن.
منبعلرنینگ سۉزلریگه کۉره، واسطهچیلر پاکستاننینگ طلبلرینی منطقي و اساسلی دېب بهالهگنلر، حتا طالبان مذاکرهچیلرینینگ اۉزلری هم اسلام آبادنینگ تروریزمگه قرشی تکلیفلرینی تۉغری دېب حسابلهگن.
خوفسیزلیک منبعلرینینگ تأکیدلشیچه، طالبان هیاتی مذاکرهلر دوامیده کابلدن دایمي کۉرستمهلر آلیب تورگن و بو حالت مذاکرهلرنینگ سېکینلشیشیگه سبب بۉلگن.
