بیرلشگن ملتلر تشکیلاتی نینگ افغانستاندهگی نمایندهلیگی (یوناما)نینگ اوچ آیلیک گزارشیده، طالبان نینگ «امر به معروف و نهي از منکر» ادارهسی اَیریم ولایتلرده عیاللرنینگ محرمسیز حالده طبي خدمتلردن فایدهلنیشیگه تۉسقینلیک قیلگنینی بیلدیردی.
بوگون (چهارشنبه ۶ عقرب) اعلان قیلینگن گزارشده قید اېتیلیشیچه، طالبان خادملری بوتون مملکت بۉیلب ساغلیقنی سقلش مرکزلرینی منتظم نظارت قیلیب، جنسي اجرهتیش، حجاب قاعدهلری و کسللرنینگ محرمی بیلن کېلیش طلبلری بجریلهیاتگنینی تېکشیرهدی.
یونامانینگ معلوماتیگه کۉره،۲۶ جولای کونی ارزگان ولایتیده امر به معروف خادملری ایکّی طبیات مرکزیگه باریب، خادملرگه محرمسیز کېلگن عیاللرگه خدمت کۉرسهتمسلیکنی بویوریشگن.
۱ سپتامبر کونی قندهارده اېسه اولر بیر ساغلیقنی سقلش مرکزینی تېکشیریب، عیال خادملر ایش جاییده محرمی بیلن بۉلیشی کېرهک، دېب ایتیشگن همده محرمسیز کېلگن کسل عیاللرنی دوالشنی منبع قیلگن.
اوشبو گزارشده، ۹ سپتامبر کونی قندهارده طالباننینگ امر به معروف ادارهسی ساغلیقنی سقلش ساحهسیدهگی مسووللر بیلن اوچرهشیب، نادولت تشکیلاتلرگه عیال طبیات خادملری دایما اېرکک محرم بیلن بیرگه بۉلیشی کېرهکلیگینی تاکیدلهگن.
شونینگدېک، ۲۲ سپتامبر کونی طالبلرنینگ امر به معروف خادملری اېرکک تیش داکترلریگه عیاللرنی دوالشنی منبع قیلگن. اولرگه کۉره، عیاللرگه خدمت کۉرسهتیش اوچون فقط عیال داکترلر ایشلشی کېرهک.
اما یوناما افغانستان ساغلیقنی سقلش تیزیمی عیال شفاکارلر تنقیصلیگیدن اذیت چېکماقده، و عینِ پیتده طالبان قیزلرنینگ اۉقیشینی، جملهدن طبیات ساحهسیدهگی تعلیمینی هم منع قیلیب قۉیگنیگه علحیده اورغو بیرگن.
