روسيه ناتو حربي تشکیلاتینی «شرقده کتّه اوروش»گه تیارگرلیک کۉرهیاتگنلیکده عیبلهدی.
روسيه «ریا» خبرگزارلیگینینگ خبر بېریشیچه، روسيه تشقی استخبارات خدمتی باشلیغی سرگئی ناریشکین بوگون (پنجشنبه،۷ جوزا) مسکودهگی خلقارا خوفسیزلیک ییغیلیشیده شوندهی دېگن: «ناتو شرقي چېگرهلریده کېنگ کۉلملی ماجرا اوچون عملي تیارگرلیک کۉرماقده.»
سرگئی ناریشکین نینگ ایتیشیچه، ناتودن تشقری، اروپا اتفاقی هم روسيهگه قرشی حربي اتفاققه ایلنیش اوچون تېز سرعتده قَیته قوراللنماقده.
اونینگ ینه قۉشیمچه قیلیشیچه، «اېکسپرت دایرهلرده کېینگی جهان اوروشی عیناً قهیېردن باشلنیشی و انسانیت اوندن امان قالیش امکانیگه اېگه یاکه اېگه اېمسلیگی جدّي محاکمه قیلینماقده.»
روسيه بوندن آلدین هم بیر نېچه بار ناتونی ینگی اوروشلرنی یوزهگه کېلتیریشگه اورینیشده عیبلهگن اېدی.
جملهدن، 2022-ییلده مسکو ناتو حدودینینگ روسيه چېگرهلری تامان کېنگهییشینی آلدینی آلیش مقصدیده اوکراینده «مخصوص حربي عملیات» باشلهگنینی اعلان قیلگن اېدی.
حاضر اوکراین اوروشی بېشینچی ییلیگه کیرگن بۉلسه-ده، مسکونینگ عینِ شو اساسدهگی حربي حرکتلری همان دوام اېتماقده.
