اسرایلنینگ بیرلشگن ملتلر تشکیلاتیدهگی اېلچیسی دنی دانون بیرلشگن ملتلر تشکیلاتی اسرایلنی «قوراللی ماجرالر منطقهلریده جنسي زۉروانلیک صادر اېتگنلر» قاره رۉیخطیگه کیریتگنینی معلوم قیلدی.
او بوگون (پنجشنبه،۷ جوزا) ایکس اجتماعي ترماغیده ویدیو مراجعت قیلیب، بو قرارنی «سیاسي و حقیقتدن ییراق قرار» دېب اتهدی.
دنی دانون نینگ ایتیشیچه، بیرلشگن ملتلر تشکیلاتی بو قراری بیلن اسرایلنی «حماس و داعش کبی اېنگ شفقتسیز ترور تشکیلاتلری» قطاریگه قۉیگن.
بیرلشگن ملتلر تشکلاتی باش کاتبینینگ ماجرالرده جنسي زوروانلیک بۉییچه مخصوص وکیلی پرامیلا پتن تامانیدن ۲۰۲۵-ییل جولای آییده اعلان قیلینگن گزارشده حماس «قوراللی ماجرالرده جنسي زوروانلیک یاکه باشقه زۉروانلیک حالتلری اوچون جدّي گمان قیلینهیاتگن تامانلر» رۉیخطیگه کیریتیلگن اېدی.
اما اسرایل اېلچیسی ایتهیاتگن ینگی گزارش حلی اعلان قیلینمهگن.
دانوننینگ ایتیشیچه، بیرلشگن ملتلر تشکیلاتی اسرایل تقدیم اېتگن دلیللرنی کۉریب چیقمهگن. اونینگ ینه قۉشیمچه قیلیشیچه: «اسرایل هر بیر دعوا بۉییچه دلیللر، حجتلر و باتفصیل جوابلر تقدیم اېتدی. بیز بیرلشگن ملتلر تشکیلاتی وکیللرینی منطقهگه کېلیب، وضعیتنی اۉرگنیشگه تکلیف قیلدیک، لېکن اولر بونی رد اېتیشدی.»
شو بیلن بیرگه، اورشلیم پست خبریگه کۉره، اسرایل بو قرارگه جوابن بیرلشگن ملتلر تشکیلاتی باش کاتبی آنتونیو گوترش ادارهسی بیلن همکارلیکنی تۉختهتیشنی رېجهلشتیرماقده.
دانوننینگ ایتیشیچه، اسرایل «حرفهای و عدالتلی باش کاتب» کېلیشینی کوتهدی. گوترشنینگ وکالت مدتی جاري ییل دسامبرده یکونلنهدی.
