بیرلشگن ملتلر تشکیلاتینینگ انسان حقوقلری بۉییچه مخصوص گزارشگری ریچارد بنت بادغیس ولایتیده بیر اېرکک عامه حضوریده اعدام قیلینگنیگه عکسالعمل بیلدیریب، بونی انسان حقوقلرینی قتّیق آیاق آستی قیلیش دېدی.
اونینگ ایکس صحیفهسیده یازیشیچه، «اۉلیم جزاسی ظالمانه، غیرِ انساني، تحقیرلی و بوندن تشقری، جنایتلرنینگ آلدینی آلیشده هم ثمرهسیزدیر.» دېگن
بیرلشگن ملتلر تشکیلاتینینگ انسان حقوقلری بۉییچه مخصوص گزارشگری ینه بیر بار اعدام جزاسی تېزلیکده تۉختهتیلیشینی طلب قیلدی.
طالبلر بوگون (پنجشنبه ۲۴میزان) قتلگه عیبدار تانیلگن بیر اېرککنی بادغیس سپورت میدانیده دارگه آسدی.
طالبلر عالی محکمهسینینگ اعلامیهسیده مذکور اېرککنینگ اسمی اسماعیل بۉلگنی بیلدیریلگن. اعلامیهده او جوند اولسواللیگیده دوستمحمد و گلبرگه نامی بیر اېرکک و بیر عیالنی آتیب اۉلدیرگنی قید اېتیلگن.
طالبلر عالی محکمهسی اسماعیل اوچون قصاص حکمی بو گروهنینگ اوچ محکمهسیده تصدیقلنگنینی معلوم قیلگن. شونینگدیک مقتوللر عایلهسیگه کچیریش و صلح پیشنهاد قیلینگن؛ لېکن اولر قصاص حکمی صادر بۉلیشینی ایستهگنلر.
طالبلر مملکتده قدرتگه اېریشگدن سۉنگ بو دارگه تارتیلگن اۉن بیرینچی مورد حسابلنهدی. عین حالده، بو بادغیس ولایتیده اعدام قیلینگن ایکّینچی مورد سنهلهدی. اوشبو گروه بوندن آلدین باشقه ۱۰کیشینی فراه، غزنی، لغمان، جوزجان، بادغیس و نیمروز ولایتلریده یوزلب تماشاچی و عامه حضوریده دارگه آسگن اېدی.
