قطر مدافعه وزیرلیگینینگ معلوم قیلیشیچه، مملکتگه تېگیشلی بیر نفت تشووچی کېمه ایران تامانیدن اوچیریلگن قناتلی راکت ضربهسیگه اوچرهگن.
وزیرلیک بیاناتیگه کۉره، بوگون اېرتهلب (چهارشنبه،۱۲حمل) ایراندن قطر تامانگه اوچته کروز راکت اوچیریلگن. اولردن ایکّیتهسی توتیب قالینگن، اوچینچی راکت اېسه قطر سوولریدهگی بیر نفت تانکریگه باریب اوریلگن.
قطر مدافعه وزیرلیگینینگ قۉشیمچه قیلیشیچه، «ضرور چارهلر کۉریلگن و۲۱ نفر خدمه اعضاسی بۉلگن تانکر تېگیشلی ادارهلر بیلن موافقلشتیریش عملگه آشیریلگن، هېچ قندهی انساني تلفات یۉق».
«قصر انرژی شرکتینینگ تصدیقلشیچه، اوشبو کمپنی اجارهسیدهگی «اکوا۱» ناملی تانکر بوگون اېرتهلب قطر شِمالیدهگی سوو حدودلریده راکت هجومیگه اوچرهگن.
کمپنی معلوماتیگه کۉره، «خدمه اعضالریدن هېچ کیم جراحت آلمهگن و بو حادثه اطراف-محیطگه هم تأثیر قیلمهگن».
بو هجوم بیرلشگن عرب امیرلیکلری دبی ساحللریده کویتلیک بیر تانکرگه هجومدن بیر کون اۉتیب صادر بۉلگن.
کویت حکومتی هم اۉز تانکریگه هجوم اوچون اېراننی مسوول دېب حسابلهگن اېدی.
اېران حاضرگچه بو هجوملر اوچون بېواسطه جوابگرلیکنی اۉز ذمّهسیگه آلمهگن، بیراق اۉز نفت و انرژی منبعلریگه هجوم بۉلسه، منطقهدهگی نفت انشاتلرینی نشانگه آلیشی حقیده آگاهلنتیرگن اېدی.
