پاکستان باش وزیری شهباز شریف، بوگون اېرتهلب (شنبه، ۸-حمل) ایران جمهور رییسی مسعود پزشکیان بیلن باتفصیل تیلفون آرقهلی صحبتلشگنینی ایتدی.
اوایکس اجتماعی ترماغیده یازیشیچه، بو تیلفون صحبتی بیر ساعتدن کۉپراق دوام اېتگن.
پاکستان باش وزیری ایران جمهور رییسی «پاکستان نینگ دوام اېتهیاتگن دیپلوماتیک سعی-حرکتلری، امریکا و فارس کۉرفزی همده اسلامي دولتلر بیلن علاقهلری، مذاکرهلرنی یېنگیللشتیریش و کېسکینلیکنی کمهیتیریش یۉلیدهگی حرکتلری» حقیده خبردار قیلگنینی بیلدیردی.
شهباز شریفنینگ قۉشیمچه قیلیشیچه، اوشبو صحبتده اسرایلنینگ ایرانگه قرشی دوام اېتهیاتگن هجوملری، جملهدن نا حربی تاسیستاتلرگه قیلینگن سۉنگگی ضربهلرنی قارهلهگن و پاکستاننینگ ایران خلقیگه بیردملیگینی یېتکزگن.
پاکستان باش وزیری اوشبو تیلفون صحبتی حقیده یازگن پیامیده امریکا نینگ ایرانگه قرشی هجوملری حقیده اېسلتمه بېرمهگن.
بو تیلفون صحبتی اېرتهگه اسلام آبادده سعوديه عربستانی، مصر و تورکيه تشقی ایشلر وزیرلری اشتراکیده بۉلیب اۉتهدیگن تۉرت تامانلهمه اوچرهشوودن آلدین عملگه آشیریلگن.
سۉنگگی کونلرده پاکستان امریکا و ایران اۉرتهسیده واسطهچیلیک قیلیش حرکتلرینی باشلهگنینی و ایکّی تامان اۉرتهسیده خبرلر المشیلگنینی معلوم قیلگن.
پاکستان باش وزیری بوندن آلدین هم مملکت ایران و امریکا اۉرتهسیدهگی احتمالي مذاکرهلرگه مېزبانلیک قیلیشگه تیار اېکنینی بیلدیرگن.
