جمعه کونی توشدن کېین، جاري قویاشي ییل نینگ۳جدی، جوزجان ولایتینینگ آقچه اولسواللیگی بازاری گوجوم بۉلیب، آدملرنینگ قتناوی دوام اېتهیاتگن پیتده بیر نېچه قوراللنگن اېرکک نصیراحمدنینگ زرگرلیک دکانیگه کیریب، اونی اۉق آتیب اۉلدیردی. قراقچیلر آلتینلرنی اۉغیرلب آلگچ، واقعه جاییدن قاچیب کېتیشدی. اوشبو بازارده تخمیناً اۉن ته زرگرلیک دکانی جایلشگن بۉلیب، بازار آقچهدهگی طالبان پولیسی بناسیدن قریب ایکّی کیلومتر اوزاقلیکده جایلشگن.
افغانستان شِمالیدهگی جوزجان ولایتیده جنایتچیلیک و قوراللی اۉغیرلیکلر سانی آشگنی ایتیلماقده. قوراللنگن اۉغریلر دکانلرگه هجوم قیلماقده. شو بیلن بیرگه، طالبان قورال آلیب یوریشنی تعقیقلهگن بۉلسه هم، قاتللیک حالتلری هم صادر بۉلماقده. اما جوزجاندهگی طالبان پولیسی جنایتچیلیک و اۉغیرلیکلر کمهیگنینی دعوا قیلماقده. نصیراحمدنینگ قرینداشلری اطلاعات روزگه ایتیشلریچه، قوراللنگن اۉغریلر اونینگ ایکّی کیلوگرام آلتینینی آلیب کېتگن و موتر بیلن واقعه جاییدن قاچیب کېتگن. بو زرگرلیک دکانی شریکلیک اساسیده ایشلهگن بۉلیب، آلتینلرنینگ بیر قِسمی نصیراحمدگه تېگیشلی اېدی. اونینگ یقینلرینینگ ایتیشیچه، شو آلتینلردن تشقری نصیراحمددن باشقه هېچ قندهی مال-ملک قالمهگن. حاضر اېسه اونینگ عایلهسی آغیر اقتصادي قیینچیلیکلرگه دوچ کېلگن.
جوزجان ولایتیدهگی طالبان پولیسی مطبوعات سۉزلاوچیسی عبدالستار حلیمی واقعهدن بیر کون اۉتیب نشر قیلگن بیاناتیده نصیراحمد نامعلوم قوراللی شخصلر تامانیدن اۉق آتیب اۉلدیریلگنینی معلوم قیلدی.
طالبان بیاناتیده شوندهی دېییلگن: «نصیراحمد، آقچه شهرینینگ بیرینچی محلهسی یشاوچیسی، نامعلوم قوراللنگن شخصلر تامانیدن اۉلدیریلدی. قاتللر واقعه جاییدن قاچیب کېتگن و اولرنی انیقلش همده قۉلگه آلیش اوچون حرکتلر باشلنگن.» نصیراحمدنینگ قرینداشلری طالبان پولیسیدن اوشبو اۉغیرلیکنی صادر اېتگن شخصلرنی قۉلگه آلیشنی و اۉغیرلنگن آلتینلرنی اولرگه قَیتریب بېریشنی طلب قیلماقده.
اۉغریلر آدملر نینگ اویلریگه هم هجوم قیلماقده
قوراللنگن اۉغریلر جمعه کېچهسی،۱۲جدی کونی تخمیناً ساعت۹:۰۰ اطرافیده جوزجان ولایتینینگ خانقاه تومنیدهگی بیر تورر جای اوییگه کیریب کېلیشدی. اوی نینگ۲۳ یاشلی ییگیت اېگهسی اۉز اوییدهگی مال-ملکنی حمایه قیلیش اوچون اۉغریلرگه قرشی قرشیلیک کۉرسهتگن، بیراق او اۉغریلر تامانیدن اۉلدیریلگن. جوزجاندهگی طالبان پولیسینینگ معلوم قیلیشیچه، اۉغریلر اویگه کیرگن پیتده ییگیتنینگ عایله اعضالری تۉی مراسمیگه کېتگن بۉلیب، اویده فقط اۉشه ییگیت یالغیز قالگن اېدی. طالبان اوشبو ییگیتنینگ شخصینی آشکار قیلمهگن. سۉنگره جوزجان ولایتیدهگی طالبان پولیسی قاتللیک و اۉغیرلیککه علاقهدارلیکده گمان قیلینیب بیر قوراللنگن اۉغری قۉلگه آلینگنینی دعوا قیلدی. اما اولر بو شخص خانقاه تومنیده اۉلدیریلگن۲۳ یاشلی ییگیتنینگ قاتلی اېکنینی انیق قیلیب ایتمهدی.
سابق قوماندان نینگ اۉلدیریلیشی
اوچینچی قاتللیک چهارشنبه کونی، ۱۷جدی کېچهسی تخمیناً ساعت۱۰:۰۰ اطرافیده جوزجان ولایتینینگ خواجه دوکوه اولسواللیگی مرکزیده صادر بۉلدی. سابق خلق کوچلری قوماندانی محمد یوسف، «یوسف قوماندان» نامی بیلن تنیلگن، تۉی مراسمیدن چیقیب کېتگنیدن سۉنگ اۉق آتیب اۉلدیریلدی.
محمد یوسف،۳۵ یاشده بۉلیب، عبدالرشید دوستم – جنبش ملی اسلامی حزبی رهبری نینگ سابق قوماندانلریدن بیری اېدی. او یقینده ایراندن افغانستانگه قَیتگن اېدی. محمد یوسف نینگ قرینداشلری اونینگ اۉلدیریلیشیده طالبان کوچلری قۉلی بارلیگینی دعوا قیلماقده. منبعلرگه کۉره، بو سابق قوماندان جوزجانگه قَیتگچ، طالبان تامانیدن حبسگه آلینیب سۉراق قیلینگن. شو بیلن بیرگه، جوزجاندن آلینگن اَیریم محلي ایشانچلی منبعلر هم یوسف قوماندان نینگ اۉلدیریلیشیده طالباننینگ قۉلی بارلیگینی تصدیقلهیدی. بیراق محلي رسميلر بو عیبلاونی رد اېتیب،۳۵ یاشلی محلي قومانداننینگ اۉلدیریلیشی بیلن باغلیق اوچ کیشی قۉلگه آلینگنینی اَیتماقده. اولرنینگ تأکیدلشیچه، قاتللیک سببی عایلهوي عداوت بۉلگن.
باشقه بیر حالتده، محمد ابراهیم اسملی بیر اېرکک فیض آباد اولسواللیگیده، دلو آییده اۉلدیریلگن. بو شخص اصلیده آقچه تومنی، جوزجانلیک بۉلیب، «دشت قشقه» منطقهسیده قتل اېتیلگن. جوزجان ولایتی پولیس قوماندانلیگی نینگ معلوماتیگه کۉره، اوشبو قاتللیک بیلن باغلیق حالده اوچ کیشی محلي اهالی یاردمی همده گروهنینگ خوفسیزلیک و استخبارات کوچلری حرکتلری نتیجهسیده قۉلگه آلینگن. بیاناتدهگی معلوماتلرگه کۉره، حبسگه آلینگن شخصلر سرپل ولایتی الجهاد اولسواللیگینینگ اصل اهالیسی بۉلگن. شونگه قرهمهی، واقعهدن بیر آیدن آرتیق وقت اۉتگن بۉلسه هم، طالبان حاضرگچه بو قاتللیکنینگ سببی حقیده باتفصیل معلومات بېرمهگن. آلینگن معلوماتلرگه کۉره، اطلاعات روزگه یېتیب کېلگن خبرلرده ایتیلیشیچه، جاري ییلنینگ دلو آییده جوزجان ولایتی شبرغان شهریده سلطان جهانگیر اسملی طلبه هم اۉلدیریلگن. او شبرغان شهرینینگ ایکّینچی خوفسیزلیک حدودیگه قرهشلی سنچارکیلر محلهسی یشاوچیسی اېدی. جاري قویاشي ییل نینگ سهشنبه کونی (۱۴ دلو) او جوزجان ولایتی مرکزی بۉلگن شبرغان شهریده پیچاق ضربهلری بیلن اۉلدیریلگن. سلطان جهانگیر جوزجن بیلیم یورتی محصلی بۉلگن.
منبعلرگه کۉره، جوزجانده اطلاعات روزگه ایتیشلریچه، جهانگیر ارش سرپل ولایتی سابق بیلیم یورتی باشلیغی و حاضرگی کونده جوزجان دولت بیلیم یورتی استادی خلیلنینگ اۉغلی بۉلگن.
جهانگیرنینگ یقینلریدن بیری اطلاعات روزگه شوندهی ایتگن: «سلطان جهانگیر، آنهسینی موتر بیلن شهرگه آلیب بارهیاتگن وقتیده، بیر باسکیل هیداوچی اونینگ موترینینگ آلدیگه چیقیب قالگن. جهانگیر موتر هارنینی باسگنیدن سۉنگ، باسیکل سوار بیلن جنجل باشلنیب، بیر نېچه ثانیهدن سۉنگ باسکیل سوار اونگه پیچاق بیلن یورهک قِسمیگه اورگن. جهانگیر یۉل دوامیده شفاخانهده وفات اېتدی.» جوزجاندهگی طالبان پولیسینینگ ایتیشیچه، اوشبو قاتللیک بیلن باغلیق حالده بیر کیشی قۉلگه آلینگن و اۉز عیبینی تن آلگن.
یشاوچیلرنینگ نابرقرارلیک آشیشیدن خواطری
جوزجان اهالیسینینگ ایتیشیچه، اولر طالباندن جنایتچیلیک و قوراللی اۉغیرلیکلرنینگ کۉپهییشینی آلدینی آلیشنی سۉرهماقده. تخمیناً ایکّی هفته آلدین، بیر کیشی شبرغان شهریده دکانیدن اوییگه کېتهیاتگنیده اۉغریلر توزاغیگه توشگن.
اونینگ اطلاعات روزگه ایتیشیچه، اۉغریلر قورالی بیلن اونی تهدید قیلیب، مبایل تیلفونینی اۉغیرلشگن: «خوفسیزلیک معمالری سببلی اېرکین سَیر قیله آلمهیمیز. هر جایده قوراللنگن اۉغریلر بار. عموماً آلگنده، حیاتیمیز بیر اۉقگه باغلیق بۉلیب قالگن. ایشانچیم کاملکی، اگر اۉشه کونی تیلفونیمنی بېرمهگنیمده، حاضر تیریک بۉلمس اېدیم.» نيازالله نینگ ایتیشیچه، طالبان شهرلرنینگ خوفسیزلیک حالتینی یخشیلشگه اعتبار بېرمهیپتی:
«نېگه طالبان یالغان گپیرهدی و بۉرتتیرهدی؟ خوفسیزلیک قهیېرده؟ تیلفونیمنی اۉغیرلشگن جای خوفسیزلیک حدودینینگ بیر نېچه قدمیده اېدی. بیزنی حیران قالدیرهدی، قندهی قیلیب آدملر شهرده قوراللنگن حالده یوریشی ممکن؟»
تخمیناً ایکّی یریم آی آلدین، اوشبو قوراللی اۉغیرلیکلردن بیریده، نامعلوم قوراللنگن شخصلر کېچقورون قرانغودن فایدهلنیب، آقچه تومنی، جوزجاندهگی سکّیز ته دکان دېوارینی تېشیب، دکانلردهگی مال-ملک و نقد پولنی آلیب کېتیشگن.
عزت الله جوزجان ولایتی آقچه اولسواللیگیدهگی دکان اېگهلردن بیری، قوراللی اۉغیرلیکلر کۉپهیگنی سببلی، دکانینی کېچقورون اېرته یاپیشگه مجبور بۉلگن، شونده اوییگه تېزراق یېتیب باریشی ممکن بۉلهدی. «هوا قارانغی بۉلیشیدن آلدین دوکانیمیزنی یاپیشگه مجبورمیز. اگر یاپمسک، هېچ قندهی کفالت یۉق. حاضر هېچ کیم بیزنینگ خوفسیزلیگیمیزنی تأمینلهمهیدی. بیر آیفون مبایل تیلفون اوچون انسان نینگ حیاتی آلیب قۉییلهدی.»
جوزجان ولایتیده جنایتچیلیک و قوراللی اۉغیرلیکلر اهالی آرهسیده خواطر اویغاتهیاتگن بیر پیتده، جوزجاندهگی طالبان پولیسی دعوا قیلیشیچه، جاري ییل نینگ قوس و جدی آیلریده۱۷۳کیشینی قۉلگه آلگن. طالبان پولیسی بیاناتیده ایتیلیشیچه، اوشبو شخصلر قاتللیک، اۉغیرلیک و باشقه جنایتچیلیکلرده عیبلنیب حبسگه آلینگن.
بیاناتده ایتیلیشیچه، طالبان پولیسی امکان قدَر قیسقه وقت ایچیده اوشبو اۉغیرلیک و جنایتچیلیکلرنی صادر اېتگن شخصلرنی قۉلگه آلگن و جوزجاندهگی جنایتچیلیک همده اۉغیرلیکلر سانی کمهیگن.
